سری نگر؍پی ڈی پی لیڈر التجا مفتی، جو پی ڈی پی صدر محبوبہ مفتی کی بیٹی ہیں، نے جموں وکشمیر میں شراب پر پابندی عائد کرنے کی پر زور وکالت کرتے ہوئے اس سلسلے میں پارٹی دفتر سے ایک دستخطی مہم شروع کرنے کا اعلان کیا ہے ۔ان کا کہنا ہے : ‘جموں وکشمیر میں شراب اور منشیات سے زندگیاں اور خاندان تباہ ہو رہے ہیں’۔موصوف لیڈر نے ان باتوں کا اظہار جمعہ کو اپنے ‘ایکس’ ہینڈل پر ایک پوسٹ میں کیا۔انہوں نے کہا: ‘جموں وکشمیر میں شراب اور منشیات سے زندگیاں اور خاندانوں بر باد ہو رہے ہیں’۔ان کا پوسٹ میں کہنا ہے : ‘اس سے پہلے کہ بہت دیر ہوجائے ہمیں اس کے خاتمے کو یقینی بنانے کے لئے یک جٹ ہونا چاہئے ‘۔التجا نے اپنے پوسٹ میں مزید کہا: ‘آپ کل پی ڈی پی دفتر سری نگر میں صبح 11 بجے سے دوپہر 2 بجے کے درمیان شراب پر پابندی کے لیے پی ڈی پی کے بل کی حمایت میں ایک دستخطی مہم کے لیے میرے ساتھ شامل ہوں’۔قابل ذکر ہے کہ جموں وکشمیر میں شراب پر پابندی کے لئے کچھ اراکین اسمبلی نے پارٹی لائنز سے الگ ہو کر پرائیویٹ بل پیش کئے ہیں۔
