جموں،16فروری(یو این آئی)آر ایس پورہ جموں کے آبزرویشن ہوم میں پیر کی شام اس وقت سنسنی خیز واقعہ پیش آیا جب تین زیرِ حراست افراد دو پولیس اہلکاروں پر حملہ کرکے فرار ہوگئے۔ فرار ہونے والوں میں دو پاکستانی شہری بھی شامل بتائے گئے ہیں۔
پولیس ذرائع کے مطابق واقعہ تقریباً شام 5 بجکر 15 منٹ پر پیش آیا، جب تینوں قیدیوں نے ڈیوٹی پر موجود پولیس اہلکاروں پر اچانک حملہ کیا اور زخمی کرکے عمارت سے فرار ہونے میں کامیاب ہوگئے۔
فرار قیدیوں کی شناخت کراجیت سنگھ عرف گوگا ساکن آر ایس پورہ، اور دو پاکستانی شہری محمد ثنااللہ اور احسن انور کے طور پر ہوئی ہے۔
واقعہ کے فوراً بعد پولیس نے کیس درج کرکے تحقیقات شروع کردی ہیں، جبکہ فرار ملزمان کی تلاش کے لیے خصوصی ٹیمیں تشکیل دی گئی ہیں۔
پولیس نے متعدد مقامات پر تلاشی مہم تیز کردی ہے اور کہا ہے کہ فرار شدہ قیدیوں کو جلد گرفتار کرلیا جائے گا۔
