نگران مانٹیرنگ ڈیسک
سرینگر // مغربی ایشیا اور خلیجی خطہ میں سلامتی کی صورتحال کے تناظر میں وزارت خارجہ نے پیر کو کہا کہ خطے میں ہندوستانی کمیونٹی کی حفاظت اور نقل و حرکت کو یقینی بنانے کے لیے وسیع پیمانے پر کوششیں جاری ہیں، جس میں 9 لاکھ سے زیادہ لوگوں کو ملک واپس لایا گیا ہے۔ وزارت خارجہ کے جوائنٹ سکریٹری(خلیج)، عاصم آر مہاجن نے ایک بین وزارتی بریفنگ کے دوران بتایا کہ وزارت میں وقف خصوصی کنٹرول روم بدستور کام کر رہا ہے اور ہندوستانی مشنوں کے ساتھ تال میل میں کام کر رہا ہے۔ انہوں نے کہا”ہمارے مشن چوبیس گھنٹے ہیلپ لائنز چلا رہے ہیں اور شہریوں کی فعال طور پر مدد کر رہے ہیں۔ وہ مقامی حکومتوں کے ساتھ قریبی رابطے میں رہتے ہیں۔” انہوں نے فلائٹ اپڈیٹس بھی شیئر کیں اور کہا کہ 28 فروری سے تقریباً 9 لاکھ 27 ہزار لوگ ہندوستان واپس آئے ہیں۔ جوائنٹ سکریٹری نے کہا”آج متحدہ عرب امارات سے ہندوستان کے لئے تقریباً 100 پروازیں چلنے کی توقع ہے۔ سعودی عرب اور عمان کے مختلف ہوائی اڈوں سے ہندوستان کے مختلف مقامات کے لئے پروازیں چل رہی ہیں۔ قطر کی فضائی حدود جزوی طور پر کھلے رہنے سے، قطر ایئرویز کی آج ہندوستان کے لئے تقریباً 8 سے 10 پروازیں چلانے کی توقع ہے”، ۔انہوں نے مزید کہا، ”بحرین کی فضائی حدود کھلی ہے۔ گلف ایئر نے اعلان کیا ہے کہ وہ بحرین سے ہندوستان کے لیے محدود پروازیں شروع کرنے کا ارادہ رکھتی ہے۔ گلف ایئر اس وقت سعودی عرب کے دمام ہوائی اڈے سے ہندوستان بھر کے مختلف مقامات کے لیے غیر طے شدہ کمرشل پروازیں چلا رہی ہے۔ ہم ہندوستانی شہریوں کے بحرین سے سعودی عرب کے ذریعے سفر کی سہولت جاری رکھے ہوئے ہیں۔”انہوں نے کہا، "تہران میں ہمارے سفارت خانے نے اب تک 2230 شہریوں کو ایران سے آرمینیا اور آذربائیجان کے لیے ہندوستان جانے کے لیے سہولت فراہم کی ہے۔ اس میں 987 ہندوستانی طلبہ اور 657 ہندوستانی ماہی گیر شامل ہیں۔”مہاجن نے اس بات پر زور دیا کہ حکومت مغربی ایشیا اور خلیجی خطے میں ہونے والی پیشرفتوں کی نگرانی جاری رکھے ہوئے ہے اور کوششیں خطے میں ہندوستانی برادری کی حفاظت، سلامتی اور بہبود کو یقینی بنانے پر مرکوز ہیں۔
