نگران نیوز
سرینگر// وزیر اعلیٰ عمر عبداللہ نے پیر کو مرکزی وزیر داخلہ امت شاہ سے ملاقات کی جہاں دونوں رہنمائوں نے مرکز کے زیر انتظام علاقوں سے متعلق متعدد امور پر تبادلہ خیال کیا۔قومی دارالحکومت کے لیے روانہ ہونے سے پہلے وزیر اعلیٰ نے سرینگر میں صحافیوں کو بتایا کہ وہ جموں و کشمیر سے متعلق تمام مسائل پر بات کریں گے۔عبداللہ نے یہ بھی کہا کہ پبلک سیفٹی ایونٹس کے دوران لیفٹیننٹ گورنر کو ٹیلی کام کے اختیارات دینے میں "کچھ غلط نہیں” ہے، کیونکہ وہ سیکورٹی اور امن و امان کا چارج رکھتے ہیں۔ انہوں نے نامہ نگاروں کو بتایا، "یہ صحیح بات ہے، یہ اختیارات لیفٹیننٹ گورنر کے پاس ہونے چاہئیں، یہ بزنس رولزیا تنظیم نو ایکٹ کے خلاف نہیں ہے۔”انہوں نے کہا کہ فون سروس یا انٹرنیٹ بند کرنے کے احکامات محکمہ داخلہ کی طرف سے جاری کیے جاتے ہیں جو کہ ایل جی کے تحت آتا ہے۔کابینہ میں توسیع پر وزیر اعلیٰ نے کہا کہ یہ مناسب وقت پر ہو گا۔انہوں نے مزید کہا کہ "یہ مسئلہ اپوزیشن اٹھا رہی ہے، مجھے نہیں معلوم کہ وہ کیوں پریشان ہیں، حکومت کا کام ٹھیک طریقے سے چل رہا ہے، اگلے الیکشن ساڑھے تین سال میں ہونے والے ہیں، جب توسیع یا ردوبدل ہونا ہے تو میں پارٹی قیادت سے اس پر بات کروں گا اور مناسب وقت پر کروں گا”۔
