نگران نیوز
اننت ناگ //اننت ناگ ٹائون میں پیر اور منگل کی درمیانی شب آگ لگنے سے ایک دارالعلوم کی عمارت آگ کی واردات میں خاکستر ہوئی اور اس حادثے میں 12 سالہ لڑکا جاں بحق اور تین دیگر بری طرح جھلس گئے۔پولیس نے بتایا کہ فیضان بابا حیدر رشی دارالعلوم میں آگ لگ گئی جس میں چار لڑکے جھلس کر زخمی ہو گئے۔مقامی لوگوں کے مطابق آگ دارالعلوم عمارت کی تیسری منزل پر رات قریب 2بجے نمودار ہوئی جس نے لکڑی کی بنی عمارت کو فوراً اپنی لپیٹ میں لیا اور جب تک آگ پر قابو پانے کی کوشش کی جاتی ، تیسری منزل پر سوئے ہوئے 4بچے اسکی لپیٹ میں آگئے جن کو شدید زخمی حالت میں باہر نکالا گیا جن میں سے بعد میں ایک 12سالہ لڑکا بلال احمد ولد محمد اکبر ساکن سنگلدان لقمہ اجل بن گیا جبکہ ثابت فیاض ،ساحل احمد اور عرفان احمد نامی 3 دیگر طالب علم بری طرح جھلس گئے، جن میں سے 1 طالب علم کی حالت نازک بنی ہوئی ہے۔متوفی بلال احمد 4 پارے حفظ کرچکا تھا۔انتظامی کمیٹی کا کہنا ہے کہ عمارت کی دوسری منزل پر 40بچے سوئے ہوئے تھے جو بال بال بچ گئے جنہیں بحفاظت باہر نکالا گیا۔انہوں نے کہا کہ تیسری منزل پر عموماً کوئی نہیں سوتا بلکہ دن میں بچے پڑھائی کرتے ہیں۔لیکن گرمی کی وجہ سے غالباً چار بچے یہاں سونے کیلئے گئے تھے جس دوران وہ آگ کی لپیٹ میں آگئے۔البتہ فائر بریگیڈ کو فوری طور پر اطلار دی گئی جس نے آگ پر قابو پالیا۔اس بیچ مدرسوں میں فائر سیفٹی آڈٹ پر ایک بار پھر سوالات کھڑے کئے جارہے ہیں۔لوگوں کا کہنا ہے کہ ضلع میں گذشتہ ایک سال میں مدرسوں میں آتشزدگی کے 4 واقعات پیش آئے ہیں،جس سے زیر تعلیم بچوں کی سلامتی کے حوالے سے خدشات پیدا ہوگئے ہیں۔
