نگران نیوز
سری نگر//پلوامہ کے پنگلنہ گائوں کے جے کے بینک محلہ سے تعلق رکھنے والے مقامی لوگوں نے پینے کے پانی کی شدید قلت کے خلاف گزشتہ دو ہفتوں میں دوسری مرتبہ احتجاج کرتے ہوئے گالندر پلوامہ روڈ کو ٹریفک کے لیے بند کر دیا۔احتجاج میں شامل لوگوں کا کہنا تھا کہ گزشتہ تقریباً تین ماہ سے گائوں میں نلوں کے ذریعے پانی کی باقاعدہ فراہمی معطل ہے، جس کے باعث شدید گرمی کے موسم میں روزمرہ کے مسائل سے تنگ آ چکے ہیں۔ انہوں نے بتایا بڑھتے ہوئے درجہ حرارت میں پانی جیسی بنیادی سہولت کی عدم دستیابی نے عوام کو شدید مشکلات سے دوچار کر دیا ہے۔ احتجاج کے دوران مظاہرین نے مطالبہ کیا کہ علاقے میں فوری طور پر پینے کے پانی کی باقاعدہ فراہمی بحال کی جائے تاکہ عوام کو درپیش مشکلات کا خاتمہ ہو سکے۔پلوامہ پولیس کی ٹیم موقع پر پہنچی، مظاہرین سے بات چیت کی اور انہیں یقین دہانی کرائی، جس کے بعد احتجاج ختم کر دیا گیا اور سڑک پر ٹریفک کی آمدورفت معمول کے مطابق بحال ہو گئی۔
