نگران نیوز
سری نگر//جموں و کشمیر میں مسلسل چوتھے روز بھی وقفے وقفے سے بارش کا سلسلہ جاری رہنے کے باعث دریاؤں اور ندی نالوں میں پانی کی سطح بلند رہی، تاہم دریائے جہلم میں پانی کی سطح بتدریج کم ہونا شروع ہوگئی ہے جس سے سرینگر سمیت وادی کے مختلف علاقوں میں کسی حد تک راحت محسوس کی جا رہی ہے۔ محکمہ موسمیات کے مطابق گزشتہ 24 گھنٹوں کے دوران جنوبی کشمیر میں سب سے زیادہ بارش ریکارڈ کی گئی، جہاں قاضی گنڈ میں 40.2 ملی میٹر، کوکرناگ میں 39.2 ملی میٹر اور پہلگام میں 25.4 ملی میٹر بارش ہوئی۔محکمہ موسمیات کے ڈائریکٹر مختار احمد نے کہا کہ 27 جولائی تک کسی بڑے یا مسلسل بارشی سلسلے کا امکان نہیں، تاہم 28 سے 30 جولائی کے دوران جموں ڈویڑن، چناب ویلی، پیر پنچال کے علاقوں اور کشمیر کے بعض حصوں میں ایک نیا بارشی سلسلہ سرگرم ہو سکتا ہے، جس کے دوران کہیں کہیں موسلادھار بارش، لینڈ سلائیڈنگ، شوٹنگ اسٹونز، مٹی کے تودے گرنے اور حساس علاقوں میں اچانک سیلاب آنے کا خدشہ ہے۔محکمہ موسمیات کے مطابق گزشتہ 24 گھنٹوں کے دوران جنوبی کشمیر میں نمایاں بارش ریکارڈ کی گئی۔ صبح ساڑھے آٹھ بجے تک قاضی گنڈ میں 40.2 ملی میٹر، کوکرناگ میں 39.2 ملی میٹر اور پہلگام میں 25.4 ملی میٹر بارش درج کی گئی، جو وادی میں سب سے زیادہ بارش والے علاقوں میں شامل رہے۔ معروف ماہر موسمیات سونم لوٹس نے کہا ہے کہ موجودہ موسمی صورتحال کے باوجود وادی کشمیر کو کسی بڑے سیلاب کا فوری خطرہ لاحق نہیں، تاہم مسلسل بارشوں کے باعث مقامی سطح پر سیلاب، اچانک آنے والے سیلابی ریلوں، لینڈ سلائیڈنگ اور نشیبی علاقوں میں پانی جمع ہونے کے امکانات برقرار ہیں، اس لیے عوام کو احتیاطی تدابیر اختیار کرنی چاہئیں۔
