نگران نیوز
سری نگر//وزیر اعظم نریندر مودی نے 1947 کی تقسیم ہند کے متاثرین کو خراج عقیدت پیش کرتے ہوئے کہا ہے کہ ملک کی تقسیم نے بے شمار زندگیوں کو متاثر کیا، خاندانوں کو اجاڑ دیا اور لوگوں کو اپنے گھروں سے بے دخل ہونے اور اپنے عزیزوں سے بچھڑنے جیسے ناقابل بیان مصائب سے گزرنا پڑا۔ یوم آزادی سے ایک روز قبل، 14 اگست کو ’’تقسیم ہند کے ہولناک واقعات کی یاد کا دن‘‘ کے موقع پر اپنے پیغام میں وزیر اعظم نے ان تمام افراد کے حوصلے اور استقامت کو یاد کیا جو تقسیم کے المناک دور سے متاثر ہوئے۔نریندر مودی نے سوشل میڈیا پلیٹ فارم ’’ایکس‘‘ پر اپنے پیغام میں کہا کہ تقسیم ہند تاریخ کا ایک ایسا لمحہ تھا جس نے بے شمار زندگیوں کو متاثر کیا، خاندان اپنے گھروں سے بے دخل ہوئے، لوگ اپنے پیاروں سے محروم ہوئے اور لاکھوں افراد نے شدید مشکلات اور تکالیف برداشت کیں۔انہوں نے کہا کہ اس تمام ہنگامہ خیزی اور مصائب کے باوجود تقسیم سے متاثرہ لوگوں نے غیر معمولی حوصلے اور عزم کا مظاہرہ کیا۔ جن افراد نے اپنا سب کچھ کھو دیا تھا، انہوں نے نامساعد حالات میں بھی ہمت نہیں ہاری بلکہ نئی زندگیوں کی تعمیر کی۔وزیر اعظم نے کہا کہ متاثرین نے مشکلات کو کامیابی میں تبدیل کیا اور اپنی محنت، جدوجہد اور صلاحیتوں کے ذریعے ملک کی ترقی میں اہم کردار ادا کیا۔ ان کی زندگی اور جدوجہد انسانی حوصلے اور استقامت کی طاقت کی یاد دلاتی ہے۔مودی نے کہا کہ ’’تقسیم ہند کے ہولناک واقعات کی یاد کا دن‘‘ ہمیں قومی ہم آہنگی اور بھائی چارے کے تحفظ کے عزم کو مزید مضبوط کرنے کا موقع فراہم کرتا ہے۔انہوں نے کہا کہ اس دن ہمیں ملک میں خیر سگالی، اتحاد اور باہمی بھائی چارے کے جذبے کو مزید مستحکم کرنے کا عہد کرنا چاہیے اور اجتماعی طور پر ایک ترقی یافتہ بھارت کی تعمیر کے لیے کام کرنا چاہیے۔
