بانڈی پورہ:جموں و کشمیر پولیس کے سربراہ دلباغ سنگھ نے ہفتہ کو کہا کہ موجودہ امن پسند ماحول کو برقرار رکھنے کے لئے پولیس کشمیر میں جنگجوئوں اور ان کے حامیوں کے خلاف سخت کارروائی کرے گی۔پولیس چیف نے طالبان کی ممکنہ دراندازی کے بارے میں سوال کاجواب دیتے ہوئے کہاکہ کسی کوبھی کشمیر کی موجودہ صورتحال کو خراب کرنے کی اجازت نہیں دی جائے گی ۔ جے کے این ایس کے مطابق ڈسٹرکٹ پولیس لائنز (ڈی پی ایل) بانڈی پورہ کے دورے کے موقع پر صحافیوں سے گفتگو کرتے ہوئے ڈائریکٹر جنرل پولیس دلباغ سنگھ نے کہاکہ پولیس اور دیگر سیکورٹی ایجنسیاں افغانستان میں طالبان کے قبضے کے تناظر میں کشمیرمیں موجودہ صورتحال کو خراب نہیں ہونے دیں گے۔ ڈی جی پی نے کہا کہ کوویڈ19 صورتحال کی وجہ سے ، پولیس افسران سے ملاقاتیں تھوڑی سست ہوگئی تھیں لیکن اب جب کہ کوویڈکا گراف نیچے جا رہا ہے ، توہم نے پولیس افسروں اورجوانوں کیساتھ رابطے کی مہم پھرتیز کی ہے ۔انہوںنے کہاکہ ہم اپنے افسروں کیساتھ موجودہ صورتحال کیساتھ ساتھ آنے والے دنوں کے حالات کوبھی زیرغورلاتے ہیں ۔پولیس چیف کاکہناتھاکہ ملاقاتوں کے دوران پولیس افسروں سے کہاجاتاہے کہ وہ ہمہ وقت چوکنا اورمسعتدرہیں تاکہ امن دشمن عناصرکی سازشوں کوبروقت ناکام بنایاجائے ۔انہوں نے کہا کہ بانڈی پورہ پرامن راستے پر ہے اور یہاں حالات میں بہتری آئی ہے۔ پولیس سربراہ نے کہاکہ سرینگر انکاؤنٹر میں طیبہ/ٹی آر ایف کے سربراہ عباس شیخ اور ان کے معاون ثاقب کی ہلاکت کے بعد لوگوں کو راحت کی سانس لی۔انہوں نے کہاکہ عباس شیخ اور اس کا ساتھی بہت سی سرگرمیوں میں ملوث تھے۔ ان کی ہلاکت کے بعد لوگ سکون محسوس کر رہے ہیں۔کشمیر میں جنگجوئوں کی بڑھتی ہوئی تعداد کے بارے میں ، ڈی جی پی دلباغ سنگھ نے کہا کہ پولیس جنگجوئوں اور اُن کے حامیوں نیز زیرزمین معاونین کے خلاف سخت کارروائی کرے گی جن میں او جی ڈبلیو بھی شامل ہیں۔ انہوں نے کہاکہ یہ بالائی زمین ورکر ہیں جو پستول لے کر مخصوص ہلاکتیں کرتے ہیں اور معصوم شہریوں کو نشانہ بنانے کے لئے دستی بم پھینکتے ہیں۔ڈی جی پی نے کہاکہ ہم ان کے خلاف بہت سخت ہو رہے ہیں۔یہ پوچھے جانے پر کہ وہ افغانستان میں طالبان کے قبضے اور کشمیر میں طالبان جنگجوئوں کی ممکنہ دراندازی کو کس طرح دیکھتا ہے ، جموں و کشمیر پولیس کے سربراہ دلباغ سنگھنے کہا کہپولیس دیگرسیکورٹی فورسزکیساتھ ملکر کشمیر کی موجودہ صورتحال کو خراب نہیں ہونے دیں گے۔ انہوں نے کہا کہ کشمیر میں اس وقت صورتحال پرامن ہے اور یہ اسی طرح رہے گی۔
