سرینگر:انٹی کورپشن بیورو نے اے آر ٹی او کپواڑہ کے دفتر میں مبینہ طوررشوت خوری کے ایک سنسی خیز سکینڈل کو طشت ازبام کرتے ہوئے لمبے عرصے سے دلالوں کے ذریعے لوگوں سے رشوت اینٹھنے کی شکایت پر اچانک مگر نتیجہ خیزچھاپہ مار کاراوئی کے دوران 15لاکھ روپے کی نقدی برآمد کی اور اے آر ٹی او مختار احمد صوفی ،محکمے کے 2انسپکٹروں اور ایک ایجنٹ کے خلاف کیس درج کرلیا ہے۔اے سی بی کی اس کاروائی کے دوران ناگری کپواڑ ہ میں ایک ڈرائیونگ ٹیسٹ سائٹ پر بھی چھاپہ ڈالا گیا جہاں بلال احمد شیخ نامی ایک ایجنٹ گاڑیوں کی چیکنگ ،فٹنس اور ڈرائیونگ لائسنس تیار کرنے میں رنگے ہاتھوں دھر لیا گیا۔ایس این ایس کے مطابق انٹی کورپشن بیورو نے بدھ کو کپواڑہ کے اے آر ٹی او آفس میں رشوت خوری اور دلالوں کے ذریعے ڈرائیونگ لائسنس ،فٹنس سرٹفکیٹ،رجسٹریشن اور پرنٹ کارڈ پرائیویٹ ایجنٹ کے ذریعے تیار کرواکر لوگوں سے روپے بٹورنے کے ایک بڑے سکینڈل کو بے نقاب کردیاہے۔نمائندے کے مطابق انٹی کورپشن بیورو کو کچھ عرصے سے مسلسل شکایات موصول ہورہی تھیں کہ اے آر ٹی او کپواڑہ نے ویلگام کپواڑہ کے بلا ل احمد شیخ نامی ایک ایجنٹ کو نامزد کیا ہے جو اے آر ٹی او دفتر کے تمام کام جیسے لائسنس کی تیاری ،فٹنس سرٹفکیٹ ،لرننگ لائسنس،پرنٹ کارڈ ،آڈٹ اپروول اور رجسٹریشن وغیرہ غیر قانونی دھندے کے ذریعے تیار کرتا ہے۔انٹی کورپشن بیورو نے شکایت کا نوٹس لیتے ہوئے ہندوارہ کے فسٹ کلاس ایگزیکٹو مجسٹریٹ کو ساتھ لے کر ناگری کپواڑہ میں ڈرائیونگ ٹیسٹ سائٹ پر چھاپہ ڈالا جہاں نمائندے کے مطابق بلال احمد شیخ ولد ولی محمد شیخ ساکن ویلگام کپواڑہ کو ڈرائیونگ ٹیسٹ لیتے ہوئے رنگے ہاتھوں پکڑ لیا گیا۔اس موقعے پر بلا ل احمد کی ذاتی گاڑی JKO1R-4373کی تلاشی بھی لی گئی جس سے موقعہ پرہی 138ڈرائیونگ لائسنس ضبط کرنے کے علاوہ ڈرائیونگ لائسنس سے متعلق عارضی رسید ،ٹرانسپورٹ پلان،لرنرس لائسنس وغیرہ پکڑ لی گئیں جن پر 4اگست 2021کی تاریخ درج تھی۔انٹی کورپشن بیورو نے اس سلسلے میں پولیس سٹیشن اے سی بی بارہ مولہ میں ایف آئی آر نمبر9/2021تحت سیکشن7درج کرکے تحقیقات شروع کردی۔ایف آئی آر اے آر ٹی او کپواڑہ مختار احمد صوفی ،موٹر وہیکلز انسپکٹر خورشید احمد کنہ اور عبدالحمید بٹ کے علاوہ بلال احمد شیخ جو پرائیویٹ ایجنٹ ہے ،کے خلاف درج کرلی گئی ۔ابتدائی تحقیقات سے پتہ چلا ہے کہ اے آر ٹی او آفس کے متذکرہ بالا افسران کا بلا ل احمد شیخ نامی ایجنٹ کے ساتھ گہرا ساز باز تھا اور سبھی مل کر لوگوں کو دو دو ہاتھوں لوٹ رہے تھے۔اے سی بی نے اے آر ٹی او مختار احمد صوفی کے گھر واقع بونیار نوشہرہ پر بھی چھاپہ ڈالا جبکہ بلال احمد شیخ کے ویلگام کپواڑہ میں واقع رہائشی مکان کی بھی چھان بین کی گئی۔انٹی کورپشن بیور و کے سپیشل جج نے ملزموں کے خلاف وارنٹ جاری کی۔تلاشی کاروائی کے دوران ملزموں کے قبضے سے 15لاکھ روپے نقد اور غیر قانونی مواد جو مختلف کاغذات تیار کرنے سے متعلق تھا ،ضبط کرلیا گیا ۔اس سلسلے میں تحقیقات جاری ہے۔
