سری نگر//فوج کی شمالی کمان کے کمانڈر لیفٹنٹ جنرل اوپیندر دویدی کا تین روزہ دورہ کشمیربدھ کومکمل ہوا۔ یکم فروری 2022 کو ادھم پور میں واقع شمالی آرمی کمانڈ کی باوقار کمان سنبھالنے کے بعد لیفٹنٹ جنرل اوپیندر دویدی کا چنار کور کا یہ پہلا دورہ کشمیرتھا۔جے کے این ایس کے مطابق آرمی کمانڈر کے تین روزہ دورے کے پروگرام کے بارے میں بریفنگ دیتے ہوئے، پی آر ائو ڈیفنس نے جاری کردہ ایک بیان میں کہا کہ لیفٹنٹ جنرل اوپیندر دویدی14 فروری 2022 کو چنار کور ہیڈ کوارٹر پہنچے تھے۔ یہاں آمد کے بعداُنھیں چنارکورکے سربراہ لیفٹیننٹ جنرل ڈی پی پانڈے، نے موجودہ سیکورٹی صورتحال اورمخالفین کے عزائم کامقابلہ کرنے کیلئے اقدامات کے بارے میں بریفنگ دی۔فوج کی شمالی کمان کے کمانڈر نے چنار کور کے سینئر افسران کے ساتھ بات چیت کی اور لائن آف کنٹرول کے ساتھ انسداددراندازی کے گرڈ کی تعریف کی۔ پی آر ائو ڈیفنس کے مطابق لیفٹنٹ جنرل اوپیندر دویدی نے ہندوستان اور پاکستان دونوں کے ڈی جی ایم اوئوز کے درمیان سیز فائر مفاہمت کی پاسداری کے لئے تشکیل کے ذریعہ استعمال کئے گئے سخت کنٹرول کی بھی تعریف کی، جو 25 فروری 2022 کو ایک سال مکمل کرے گا۔فوج کی شمالی کمان کے کمانڈر نے جنگجومخالف کارروائیوںکے دوران بہترین پیشہ ورانہ صاحیتوں کامظاہرہ کرنے اورجانی نقصان سے بچنے کیلئے فوجی افسروں اورجوانوںکی تعریف کی ،جس کے نتیجے میں جنگجوگروپوںمیں نوجوانوںکی بھرتیوں میں مجموعی طور پر کمی آئی ہے۔بیان میں کہا گیا ہے کہ لیفٹنٹ جنرل اوپیندر دویدی نے سی آر پی ایف کے 40 بہادروں کو بھی خراج عقیدت پیش کیا جنہوں نے3 سال قبل اس دن قافلے پر حملے کے دوران عظیم قربانی دی تھی۔ پی آر ائو ڈیفنس کے مطابق فوج کی شمالی کمان کے کمانڈر لیفٹنٹ جنرل اوپیندر دویدی نے مختلف سول کارکنوں اور سول سوسائٹی کے اراکین سے بات چیت کی۔ انہوں نے کشمیر میں پائیدار امن اور ترقی کیلئے تمام ایجنسیوں کی جانب سے اٹھائے جانے والے تیز رفتار اقدامات کو سراہا۔ انہوں نے سیکورٹی فورسز اور سول انتظامیہ کے تمام عناصر کے درمیان ہم آہنگی کی تعریف کی۔
