سرینگر: جل شکتی محکمہ کے پرنسپل سیکرٹری اشوک پرمار نے سوموار کو جموں و کشمیر کے ہر گھر میں مقررہ مدت میں پائپ کے ذریعے پانی کی فراہمی کے خواب کو پورا کرنے کیلئے وسائل کی تیز رفتار اور زیادہ سے زیادہ متحرک ہونے پر زور دیا ۔ ان خیالات کا اظہار انہوں نے یہاں سول سیکرٹریٹ میں ڈپٹی کمشنروں اور محکمہ جل شکتی کے افسران کی میٹنگ کے دوران کیا ۔ میٹنگ میں مشن ڈائریکٹر جل جیون مشن ، منیجنگ ڈائریکٹر کے پی ڈی سی ایل ، جموں و کشمیر کے تمام ڈپٹی کمشنرز ، چیف انجینئر جل شکتی کشمیر ، چیف انجینئر جل شکتی جموں ، چیف انجینئر آئی اینڈ ایف سی جموں ، چیف انجینئر آئی اینڈ ایف سی کشمیر ، سپرنٹنڈنگ انجینئرز کے علاوہ پراجیکٹ منیجمنٹ کنسلٹنٹس ( پی ایم سی ) ٹی پی آئی اے ، ایس اور میڈیا ایجنسی کے نمائندوں نے شرکت کی ۔ پرنسپل سیکرٹری نے ٹینڈرز /الاٹمنٹ کو حتمی شکل دینے اور سول /الیکٹرو مکینیکل کام جیسے بول ویل /ٹیوب ویل ، اوور ہیڈ ٹینک ، فلٹریشن پلانٹس ، پائپ نیٹ ورک بچھانے وغیرہ کو فوری طور پر انجام دینے کی ہدایت دی ۔ انہوں نے افسران کو ہدایت دی کہ ’’ ڈسٹرکٹ ایکشن پلانز ( ڈی اے پی ) کو 15 دن کے اندر حتمی شکل دینے کیلئے ڈپٹی کمشنرز ، ایس ای اور عوامی نمائندوں کے درمیان بہترین ہم آہنگی ہونی چاہئیے ۔ ‘ ‘ چیف انجینئرز اور سپرنٹنڈنگ انجینئرز کو ہدایت دی گئی کہ وہ اس بات کو یقینی بنائیں کہ تمام ڈی پی آرز کو مالیاتی اختیارات کے مطابق انتظامی منظوری اور تکنیکی پابندیاں دی جائیں ۔ انہوں نے ڈپٹی کمشنروں سے کہا کہ وہ جل شکتی محکمے کو کاموں کو آسانی سے نافذ کرنے کیلئے جنگلات اور دیگر لائن محکموں سے بروقت منظوری حاصل کرنے میں سہولت فراہم کریں ۔ لفٹ اسکیموں کیلئے الیکٹرک سب اسٹیشن کے قیام کیلئے انہوں نے ضلع انتظامیہ اور محکمہ پی ڈی ڈی اور جل شکتی کے افسران کو مربوط کوششوں پر زور دیا ۔ میٹنگ میں مختلف اضلاع میں خاص طور پر یو ٹی کے دور دراز علاقوں میں مشینری کی خرابی کے مسئلے سے نمٹنے کیلئے پمپوں /موٹروں کے بفر اسٹاک کی تشکیل پر بھی تبادلہ خیال کیا گیا ۔ انہوں نے عوامی نمائندوں کت کردار پر روشنی ڈالی اور ڈپٹی کمشنروں اور انجینئروں کو ہدایت دی کہ وہ انہیں اور دیگر اسٹیک ہولڈرز کو نچلی سطح پر جل جیون مشن کی منصوبہ بندی ، نفاذ اور نگرانی میں شامل کریں ۔
