سری نگر//مرکزی سیکرٹری داخلہ اَجے کمار بھلہ نے بدھوار کو دو یوٹیوں جموںوکشمیر اور لداخ میں شہری ہوا بازی ، زراعت اور باغبانی شعبوں میں مختلف سکیموں کی عمل آوری کا جائزہ لینے کے لئے ایک اعلیٰ سطحی میٹنگ کی صدارت کی۔میٹنگ میں چیف سیکرٹری جموںوکشمیر ڈاکٹر ارون کمار مہتا ، لداخ لیفٹیننٹ گورنر کے مشیر اُمنگ نرولہ،سیکرٹری وزارتِ شہری ہوا بازای پردیپ سنگھ اور جوائنٹ سیکرٹری وزارتِ زراعت اور بہبود کساناں نے شرکت کی۔دورانِ میٹنگ سری نگر اور جموں کے ہوائی اڈوں پر مناسب سہولیات اور اِنتظامات کر کے رات کے اوقات میں تجارتی پروازوں کو چلانے کے اِمکان پر تفصیلی غور وخوض ہوا۔چیف سیکرٹری جموںوکشمیر نے مرکزی سیکرٹری کو آگاہ کیا کہ سری نگر ایئرپورٹ پر رات 10 بجے تک پروازیں چلانے کے لئے بنیادی ڈھانچے اور تکنیکی سہولیات موجود ہیں۔تاہم سردیوںکے مہینوں کے دوران فضائی رابطوں میں رکاوٹوں کی وجہ سے مرئیت کو بہت کم کیا جاتا ہے۔سیکرٹری شہری ہوا بازی نے کہا کہ سری نگر ہوائی اڈے پر رات کے لئے لائٹنگ منصوبے کو جلد سے جلد مکمل کرنے کی کوششیں کی جارہی ہیں ۔اسی طرح جموں ائیر پورٹ پر جاری ہوائی پٹی کی مرمت کا کام رواں ہفتے میں مکمل ہوجائے گا اور اس کے بعد جموں ائیر پورٹ پر رات کی پروازوں کو چلانے کے قابل بنانے کے لئے ماہ کے آخیر تک لائٹس کی تنصیب کی جائے گی۔سیکرٹری داخلہ نے اعلیٰ کثافت والے باغبانی کے باغات کی صورتحال اور وسیع منڈیوں تک اس کی تیز تر آمدورفت کا بھی جائزہ لیا۔یہ فیصلہ لیا گیا کہ جموں و کشمیر کی حکومت کی ضروریات کو پورا کرنے کے لئے موجودہ سکیم میں ترمیم کی جانچ کرنے کے لئے جموں و کشمیر حکومت ، وزارت شہری ہوا بازی اور وزارت زراعت و بہبود کساناں کے نمائندوں پر مشتمل ایک کمیٹی تشکیل دی جائیگی۔
