کرگل ؍؍رنگ یل نیوزسروس؍؍ سی ای سی آئس ہاکی چمپئن شپ آج کھری سلطان چو اسپورٹس اسٹیڈیم بیماتھنگ کرگل میںاختتام پذیر ہوئی جس میںکڑاکے کی سردی کی باوجود ضلع بھرکی ستائس ٹیموںنے شرکت کی جن میں عورتوں کی چارٹیمیں بھی شامل تھیں۔ ٹورنامنٹ کے اختتامی مقابلے میں ہل کونسل کرگل کے سربراہ فیروزاحمدخان مہمان خصوصی تھے جبکہ ہل کونسل کرگل کے ایکزیکیٹوکونسلرانجینئرپونچوک ٹشی ،ایکزیکیٹوکونسلرمحسن علی ،ڈپٹی کمشنر کرگل سنتوش سکھ دیو،چیرمین لداخ حج کمیٹی محمدعلی مجاز اورڈسٹرکٹ یوتھ سروسز اینڈاسپورٹس آفیسرکرگل عابدعلی کے علاوہ ضلع انتظامیہ کے دیگر اعلیٰ آفیسران ،آئس ہاکی کھلاڑیوں اور شائقین کی کثیرتعدادموجودتھی۔اس موقع پر مہمان خصوصی ہل کونسل کرگل کے سربراہ فیروزاحمدخان نے اپنے خطاب میں آئس ہاکی ٹورنامنٹ میں دونوں فاتح ٹیموں کی کوششوں کو سراہتے ہوئے انھیں مبارکبادپیش کی ۔ انہوں نے ٹورنامنٹ میں حصہ لینے والی خواتین ٹیموں کی کاوشوں کو بھی سراہا۔انھوں نے ضلع میں آئس ہاکی کھیل کی اہمیت ومقبولیت کے بارے میں بتایاکہ آئس ہاکی کھیل کو ضلع میں گذشتہ کئی سالوں کے اندرکافی فروغ ملاہے یہی وجہ ہے کہ ضلع کے سبھی دیہات یعنی بلاک ہیڈکواٹروں تحصیل وسب ڈویژن سطح پر آئس ہاکی کھیل کو مزیدفروغ دینے کے لئے آئس ہاکی رنک تعمیر کئے جارہے ہیں ۔اس کے علاوہ ضلعی سطح پر دوبڑ ے بین الاقوامی سطح کے آئس ہاکی رنک زیرتعمیر ہیں جواگلے سال مکمل ہوجائیںگے۔انھوں نے مزیدبتایاکہ رواں مالی سال کے دوران ہل کونسل کے کونسلروں نے سبسیٹی کمپوننٹ اسکیم کے تحت نصف فیصدسے زیادہ فنڈزکھیل کود میں مختص کئے ہیں اور ضلع میں دیگر قومی وبین الاقوامی سطح کے کھیلوں کے بجائے یہاں کی روایتی کھیلوں آئس ہاکی ۔تیراندازی اور ہارس پولوکوفروغ دیا گیاہے ۔انہو ںنے کہا کہ یہاں کھیل کو دمیں آگے بڑھنے کے کافی مواقع ہیں جس کو لیکریہاں کے کھلاڑی قومی وبین الاقوامی سطح پربھی نمایاں کارکردگی کا مظاہرہ کرسکتے ہیں۔ کیونکہ مستقبل میں یہ ٹورنامنٹ نہ صرف یوٹی سطح پر بلکہ قومی اور بین الاقوامی سطح پر بھی کھیلا جائے گا جس کے لیے ہل کونسل ہر ٹیم کو ہر ممکن تعاون فراہم کرے گی۔۔ انہوں نے مزیدبتایاکہ ہل کونسل کرگل یہاں کے نوجوان کھلاڑیوں کی صلاحیت کومزیدفروغ دیکرقومی وبین الاقوامی سطح پر کھیلنے کے قابل بنانے کے خاطرہرممکن امدادفراہم کرنے کوتیارہے۔انھوں نے ٹورنامنٹ میں فائنل مقابلے میں شریک ٹیموںکو مبارکبادپیش کرتے ہوئے ٹورنامنٹ کا فاتح بننے پر فرینڈز پشکم اے کو آئس ہاکی کے مکمل سیٹ فراہم کرنے کااعلان کیااختتامی تقریب میں محکمہ یوتھ سروسز اینڈاسپورٹس آفیسرکرگل عابدعلی نے خطبہ استقبالیہ پیش کیا ۔واضح رہے یہ ٹورنامنٹ رواں مہینے کی گیارہ تاریخ سے اٹھارہ تاریخ تک جاری رہا۔ٹورنامنٹ کا پہلا فائنل مقابلہ خواتین کے زمرے میں واکھا ملبیک اور ڈاؤن ہل کرگل کے درمیان کھیلا گیا۔اورڈاؤن ہل کرگل نے 3:0کے فرق سے جیت حاصل کی ۔دوسرا فائنل مقابلہ مردوں کے زمرے میں فرینڈز پشکم اے اور ہمس دراس کے درمیان کھیلا گیا۔اس طرح فرینڈز پشکم اے نے 3:1 کے تناسب سے جیت کر ہمس دراس کو مقابلے میں شکست دی۔آخر میں تقسیم انعامات کی تقریب منعقد ہوئی جس میں فرینڈز پشکم اے کے سرفراز احمد کو میچ کا بہترین کھلاڑی اور سیریز کا بہترین کھلاڑی قرار دیا گیا اور انہیں بالترتیب 3000 اور 5000 روپے کے نقد انعام سے نوازا گیا۔اسی طرح ڈاون ہل کرگل سے تعلق رکھنے والی ثمینہ بانو کو بالترتیب 3000 اور 5000 روپے کا نقد انعام دیا گیا اور انہیں میچ کی بہترین کھلاڑی اور سیریز کی بہترین کھلاڑی قرار دیا گیا۔فرینڈز پشکم اے کو 50,000 روپے کا نقد انعام اور ڈاون ہل کرگل کو 50,000 روپے کانقد انعام دیا گیا۔اسی طرح رنر اپ ہونے پر ہمس دراس اور واکھا ملبیک کوفی ٹیم 30,000روپے دیئے گئے۔ اس کے علاوہ کھلاڑیوں کو نقد انعامات، مومنٹو اور سرٹیفیکیٹس بھی دیئے گئے۔
