نیوز ڈیسک
سرینگر//جموں و کشمیر کے لیفٹیننٹ گورنر منوج سنہا نے جمعرات کو کہا کہ کشمیری نوجوانوں کی بڑی تعداد کھیلوں کے میدان میں اپنا مستقبل سنوار رہی ہے اور وادی کے نوجوانوں نے پتھروں کی جگہ کرکٹ بیٹ، ہاکی اور بیڈمنٹن ہاتھ میں لے لئے ہیں۔ایل جی نے کہاکہ یہ وزیر اعظم نریندر مودی کے تین سال قبل کئے گئے عہد کا نتیجہ ہے جس نے جموں و کشمیر میں رکاوٹوں کو دور کیا اور تمام مسائل کو حل کیا۔ایل جی منوج سنہا جموں میں رولنگ ٹرافی جس میں 42000 شرکاء نے شرکت کی،کی اختتامی تقریب سے خطاب کررہے تھے ۔انہوں نے کہا کہ کویڈ نے کھیلوں کے جذبے کو کچھ وقت کیلئے کم کر دیا لیکن نوجوانوں کی ایک بڑی تعداد کھیلوں کے میدان میں نئی تاریخ رقم کر رہی ہے۔انہوں نے مزید کہا کہ وہ حقیقی چیمپئن ہیں اور جموں و کشمیر کاقابل فخرسرمایہ ہیں۔منوج سنہا نے کہا کہ اکتوبر 2020 میں حکومت نے نوجوانوں کے جوش و جذبے کو دیکھ کر ہر پنچایت میں انہیں کھیلوں کے کٹ فراہم کرنے کے لیے قدم اٹھایا "ہم نے خوش مزاج نوجوانوں کو یقین دلایا تھا کہ انہیں کھیلوں کا بہترین ڈھانچہ ملے گا۔ پنچایت کی سطح پر ٹیلنٹ کا پتہ لگایا جا رہا ہے اور کھلاڑیوں کو اپنی صلاحیتوں کو ثابت کرنے کے لیے بہترین رہنمائی فراہم کی جا رہی ہے‘‘ ایل جی نے کہا۔انہوںنے کہا کہ کھلاڑیوں نے کھیل کے میدان میں اپنی نرمی اور برداشت سے نوجوان نسل کو متاثر کیا، کھیلوں کے لازمی جذبے کو تازہ کیا اور اس ٹورنامنٹ کو واقعی یادگار بنا دیا۔انہوں نے کہا کہ محکمہ یوتھ اینڈ اسپورٹس، مشن یوتھ اور اسپورٹس کونسل ٹیلنٹ کا پتہ لگانے اور انہیں ایک مناسب پلیٹ فارم فراہم کرنے کے لیے گائوں گائوں جا رہے ہیں۔ ایل جی منوج سنہا نے کہا ’’دیہات کی سطح پر کھیلوں کے معیاری ڈھانچے کی تعمیر پر خصوصی توجہ دی جا رہی ہے‘‘۔
