عام لوگوں کی تجاویز کا خیر مقدم کیا جائے گا: لیفٹیننٹ گورنر

سرینگر// نگران نیوز ڈیسک//
لیفٹیننٹ گورنر منوج سنہا نے کہا کہ جن لوگوں نے اپنی پانچ پیڑیوں کیلئے جائیداد جمع کررکھی ہے وہی عناصر پراپرٹی ٹیکس معاملے پر نالاں دکھائی دے رہے ہیں۔ انہوں نے کہا کہ پراپرٹی ٹیکس کا مدعا و مقصد عام لوگوں کی زندگی کے معیار کو بہتر بنانا ہے۔ نگران نیوز ڈیسک کے مطابق لیفٹیننٹ گورنر منوج سنہا نے سنیچروار کو سرینگر میں ایک سرکاری تقریب کے دوران گفتگو کرتے ہوئے بتایا کہ جن لوگوں نے اپنی پانچ پیڑیوں کیلئے جائیداد جمع کررکھی ہے، وہی عناصر سرکاری فیصلہ پر نالاں دکھائی دے رہے ہیں۔ انہوں نے کہا کہ یہ عناصر لوگوں کو( بہکاوے میں لانے کیلئے پراپرٹی ٹیکس سے متعلق غلط معلومات شیئر کررہے ہیں جس کا حقیقت سے کوئی بھی تعلق نہیں ہے۔ لیفٹیننٹ گورنر نے بتایا کہ پراپرٹی ٹیکس ملک بھر کی ریاستوں اور مرکزی زیر انتظام علاقوں میں بہت پہلے نافذ کیا گیا ہے جبکہ جموں کشمیر یوٹی ایسی واحد علاقہ ہے جہاں جائیداد ٹیکس کو آخر پر لاگو کیا گیا۔ انہوں نے بتایا کہ اگر عام لوگ جموں کشمیر کا مقابلہ ملک کی دیگر ریاستوں اور یوٹیز کیساتھ کریں گے تو جموں کشمیر ایسی واحد ریاست ہے جہاں پراپرٹی ٹیکس کی شرح انتہائی کم مقرر کی گئی ہے۔ ناجائز ذرائع سے جائیداد کو اکٹھا کرنے والوں پر چوٹ کرتے ہوئے لیفٹیننٹ گورنر نے بتایا کہ جو لوگ اپنی جائیداد کو کرایہ پر دیتے ہیں اور ماہانہ اُس پر لاکھوں کی رقم وصول کرتے ہیں ، وہی عناصر جائیداد ٹیکس سے متعلق لوگوں کو گمراہ کرنے کی کوشش کرتے ہیں۔ انہوں نے کہا کہ جو لوگ اپنی جائیداد پر لاکھوں کی رقم بطور کرایہ حاصل کرتے ہیں وہ اب چند سو یا ہزار روپے ادا کرنے کیلئے لوگوں میں غلط معلومات شیئر کرتے ہیں۔ انہوں نے بتایا کہ پراپرٹی ٹیکس کا مدعا و مقصد لوگوں کی زندگی کے معیار کو بہتر بنانا اور جموں کشمیر کی کل ہم ترقی کو یقینی بنانا ہے تاکہ بیرون ریاست سے آنیوالے لوگ مقامی آبادی پر فخر کرسکیں۔ لیفٹیننٹ گورنر کا کہنا تھا کہ حکومت نے پراپرٹی ٹیکس پر عوام کی طرف سے تجاویز لینے کیلئے ٹول فری نمبر بھی جاری کیا ہے تاکہ عام لوگوں کی جائز شکایات سے حکومت آگاہ ہوسکے۔