کشمیر انفو//
جموں/26؍مارچ:’ اِنسپائر جنرل زیڈ ‘‘ پروگرام میں تبدیلی لانے والوں کی ایک اور متاثر کن داستان کو شامل کرتے ہوئے سابق اِنڈین اور بین الاقوامی کرکٹر سریش رینہ کے ساتھ 13 ویں قسط کو محکمہ اطلاعات اور تعلقات عامہ (ڈی آئی پی آر ) کے تمام سوشل میڈیا ہینڈلز اور اس کی آفیشل ویب سائٹ پر جاری کی گئی ہے۔ ’’ اِنسپائر جنرل زیڈ ‘‘ ایک ڈیجیٹل شو ہے جسے محکمہ اطلاعات و تعلقات عامہ نے جموںوکشمیر کے نوجوانوں کو مشغول کرنے ، تفریح اور حوصلہ افزائی کرنے کے لئے بنایا ہے۔ سریش رینہ نے شو کے میزبان راشد اَندرابی کے ساتھ ایک اِنٹرویو میں ایک کرکٹر کے طور پر اَپنے تجربات ، جموں وکشمیر سے اَپنے سفر اور جذباتی تعلق کو شیئر کیا ہے ۔سریش رینہ لکھنؤ میں پیدا ہوئے اور پرورش پائی لیکن ان کے اہل خانہ کا تعلق رعناواری کشمیر علاقے سے ہے۔سریش رینہ نے گفتگو میں اَپنی دِلچسپی کے شعبوں کے بارے میں بتایا اور کہا کہ اُنہیں گائیکی ، کھانا پکانا اور بچوں کے ساتھ وقت گزارنا بہت پسند ہے ۔اُنہوں نے 2005ء میں گھٹنے کی اِنجری کے بعد اَپنی زندگی کے بُر ے دور کے بارے میں بات کرتے ہوئے کہا کہ میری سرجری کے بعد ایک برس میری کرکٹ کی زندگی کا مشکل ترین حصہ تھا۔ میں نے اَپنے والد سے بہت کچھ سیکھا اور اس مشکل مرحلے سے کامیابی کے ساتھ نکل آیا۔سریش رینہ نے مزیدکہا کہ میرے والد میرے کوچ ، دوست اور میرے لئے بہت کچھ تھے۔اُنہوں نے اس مشکل وقت میںمیری رہنمائی کی۔سریش رینہ نے جموںوکشمیر کو دُنیا کا سب سے خوبصورت مقام قرار دیتے ہوئے کہا کہ جموںوکشمیر کے لوگوں کی مہمان نوازی بہترین ہے اور اُنہوں نے اَپنے اہل خانہ اور دوستوں کے ساتھ کشمیر میں طویل وقت گزارا ہے ۔اُنہوں نے کرکٹ کے مصنف بھارت سندر یسن کے ساتھ اَپنے لکھنے کے شوق اور حال ہی میں جاری کی گئی کتاب ’’ بیلیو: وَٹ لائف اینڈ کرکٹ ٹاٹ می‘‘ کے بارے میں بات کرتے ہوئے کہا کہ اِس کتاب کے پیچھے کا مقصد یہ تھا کہ میں اَپنی داستان سب کو بتائوں کہ کس طرح ایک چھوٹے سے شہر کے لڑکے نے اَپنا خواب پورا کیا۔ایک کامیاب کرکٹر ہونے کے ناطے اور لوگوں کو میرے سفر سے سیکھنا چاہیے۔ میں واقعی لوگوں کا شکر گزار ہوں کہ اُنہوں نے میری کتاب کو پسند کیا۔سریش رینہ نے اپنے پیغام میں اُبھرتے ہوئے کرکٹروں اور دیگر کھلاڑیوں سے کہا کہ وہ صرف محنت کریں کیوں کہ زندگی میں کوئی شارٹ کٹ نہیں ہوتا ہے ۔اُنہوں نے مزید کہا کہ اگر آپ سنجیدگی سے اَپنے خوابوں کو حاصل اور پورا کرنا چاہتے ہیں تو صرف اَپنے جذبے کی پیروی کریں اور اور اَپنے آپ پر یقین رکھیں۔
