ہندوستان‘ دنیا کیلئے نئی اُمید اور اُمنگ

وزیر اعظم کی قیادت میں ملک جامع ترقی کے ماڈل میں تبدیل

کشمیر انفو//
سری نگر/14؍جولائی:لیفٹیننٹ گورنر منوج سِنہا نے جمعہ کو سری پرتا پ ہائیر سکینڈری سکول سری نگر میں سینٹرل بیورو آف کمیونیکیشن وزارتِ اطلاعات و نشریات کے زیر اہتمام ملٹی میڈیا ایگزبشن کے اِختتامی تقریب میں شرکت کی۔اِس موقعہ پر لیفٹیننٹ گورنر نے اَپنے خطاب میں ہندوستان کی ترقی کے سفر کو شیئر کیا اور ’’ سیوا، سوشاسن اور غریب کلیاں‘‘ کے نو سال کو اُجاگر کرنے والی 5 روزہ نمائش کے اِنعقاد کے لئے سینٹرل بیور و آف کمیونیکیشن ( سی بی سی ) کی کوششوں کی سراہنا کی۔اُنہوں نے کہا ،’’ گزشتہ 9 برسوں میں وزیر اعظم نریندر مودی جی کی قیادت میں ملک ایک اِقتصادی ترقی اور دُنیا کے لئے جامع ترقی کے ماڈل میں تبدیل ہو ا ہے۔‘‘لیفٹیننٹ گورنر نے کہا کہ 9برس تمام شہریوں کے لئے مساوات اور مواقع پیدا کرنے کے لئے جامع اور دیر پاترقی کے لئے وقف کئے گئے ہیں۔ اُنہوں نے کہا کہ ملک بنیادی ڈھانچے کی تیز ترین ترقی ، پسماندہ اَفراد کو بااِختیار بنانے ، خود اَنحصاری اور اسپریشنل سوسائٹی کا مشاہدہ کر رہا ہے۔اُنہوں نے کہا ،’’ وزیر اعظم کی قیادت میں ہندوستان عالمی ترقی کے ایک اہم محرک کے طور پر اُبھرا ہے۔ ہندوستان نے نہ صرف ماضی کی شان دوبارہ بحال کی ہے بلکہ وہ دُنیا کو نئی اُمید اور نئی اُمنگیں بھی پیش کر رہا ہے ۔‘‘لیفٹیننٹ گورنر نے کہا کہ سماج کے تمام طبقات کو بااِختیار بنانا ،ہر شعبے میں نئے اِنقلابات ملک کی ترقی اور عوام کی خوشحالی کے سنہری دور کی عکاسی کرتے ہیں۔تقریب میں لیفٹیننٹ گورنر نے وزیر اعظم کی رہنمائی میں جموںوکشمیر یوٹی میں ہونے والی تبدیلی پر روشنی ڈالی۔اُنہوں نے کہا،’’ جموںوکشمیر ترقی کے پیرامیٹروں پر کھڑا ہے اور خود اعتمادی سے بھر ا ہوا ہے ۔ ترقی کے ثمرات سماج کے تمام طبقات تک پہنچ رہے ہیں اور وہ ملک کی ترقی میں پوری طرح سے حصہ لے رہے ہیں۔‘‘لیفٹیننٹ گورنر نے کہا،’’ نوجوانوں، خواتین اور کسانوں کی طاقت اور اسپریشنل سوسائٹی جموںوکشمیر کو نئی بلندیوں پر لے جارہی ہے ۔ ہمیں ساتھ مل کر اَمرت کا ل میں وِکست جموںوکشمیر بنانا ہے اور یہ ہماری اِجتماعی ذمہ داری ہونی چاہئے کہ ہر شہر اور گائوں کا مقصد بلندکیاجائے اور ان کی خواہشات کو پورا کیا جائے۔‘‘اُنہوں نے کہا کہ خواتین اور نوجوان جموں وکشمیر کے مضبوط اور شاندار مستقبل کے معمار ہیں۔ اُنہوں نے مزید کہا کہ حالیہ اِصلاحات اور اَقدامات نے سکیموں کو نئی رفتار دی ہے جس کا مقصد انہیں بااختیار بنانا ہے۔لیفٹیننٹ گورنر نے نوجوانوں سے خطاب کرتے ہوئے کہا کہ وزیر اعظم کی رہنمائی میں قومی تعلیمی پالیسی ملک کے مستقبل کو بدلنے کی صلاحیت رکھتی ہے ۔اُنہوں نے مختلف شعبوں میں حاصل ہونے والی پیش رفت اور مرکزی معاونت شدہ اور یوٹی سیکٹر کی سکیموں کے بارے میں بھی بتایا ۔اُنہوں نے مزید کہا کہ وزیر اعظم کی انتھک کوششوں کی بدولت ہم اس مالی سال کے آخرتک ’’ ہر گھر نل سے جل ‘‘ کے تحت ہر گھر کو نل کا پانی فراہم کرنے میں کامیابی حاصل کرسکیں گے ۔اِس موقعہ پر لیفٹیننٹ گورنر نے حکومت کے متعدد اَقدامات اور فلاحی پروگراموں پر روشنی ڈالتے ہوئے مختلف محکموں کی جانب سے لگائے گئے سٹالوں کا بھی دورہ کیا۔ایڈیشنل ڈائریکٹر جنرل پی آئی بی چندی گڈھ راجندر چودھری ، سول ایڈمنسٹریشن ، پولیس اور سینٹرل بیورو آف کمیونیکیشن کے سینئر اَفسران ، اَساتذہ ، طلباء اور نوجوانوں کی بڑی تعداد موجود تھی۔