جموں /06 ؍دسمبر//
محکمہ اطلاعات و تعلقات عامہ (ڈی آئی پی آر) نے آج سابق صدر جمہوریہ ہند اور تجربہ کار ایرو سپیس اور دفاعی سائنسدان ڈاکٹر اے پی جے عبدالکلام پر ایک میموریل لیکچر سیریز کا اِنعقاد کیا۔
کنونشن سینٹرجموں میں منعقد ہونے والی اس تقریب میں خلائی اور دفاعی ٹیکنالوجی کے شعبوں سے تعلق رکھنے والے نامور مقررین نے شرکت کی۔
ڈیفنس ریسرچ اینڈ ڈیولپمنٹ آرگنائزیشن (ڈی آر ڈی او) اور اِنڈین سپیس ریسرچ آرگنائزیشن (آئی ایس آر او) کے سابق سائنس دانوں نے ان اہم شعبوں میں ہندوستان کی ترقی کے بارے میں قیمتی معلومات پیش کیں۔
سہ پہر کے سیشن میں ایک سینئر خلائی سائنسدان اور آئی ایس آر او کے سابق گروپ ڈائریکٹر ڈاکٹر سریش نائیک نے آئی ایس آر اوکے شاندار سفر کے بارے میں ایک تفصیلی پرزنٹیشن سے سامعین کو محظوظ کیا۔
لیکچر سیریز کے مہمان خصوصی ڈاکٹر سریش نائیک نے چندریان سیریز اور اس برس اگست میں چاند پر چندریان ۔3 کی سافٹ لینڈنگ سمیت حالیہ خلائی مشنوں کی کامیابی پر روشنی ڈالی۔
ڈاکٹرسریش نائیک نے سورج کی کھوج کے لئے آنے والے آدتیہ۔ایل1 مشن کے بارے میں تفصیل سے بتایا اور مستقبل کی کوششوں جیسے کہ منگلیان، گگنیان، شکریان، 2035 ء تک ہندوستانی خلائی سٹیشن اور 2040 ء تک چاند پر پہلا ہندوستانی بھیجنے کے ویژن کا خاکہ پیش کیا۔
اِفتتاحی سیشن میں ڈی آر ڈی او کے سابق سائنسدان کاشی ناتھ دیودھر نے گذشتہ چار دہائیوں میں دفاعی ٹیکنالوجی کی پیش رفت کا جامع جائزہ پیش کیا اور ہندوستان کی دفاعی صلاحیتوں میں اہم سنگ میل اور پیش رفت پر روشنی ڈالی۔
ہر لیکچر سیشن کے بعد ایک سوال و جواب سیشن کا اِنعقاد ہوتا رہا جس میں مختلف کالجوں کے شرکأ کو دورہ کرنے والے سائنسدانوں کے ساتھ مشغول ہونے کی اِجازت دی گئی جس سے خلائی تحقیق اور ٹیکنالوجی کے بارے میں گہری معلومات حاصل ہوئی۔
کٹرہ سے تعلق رکھنے والے پیراولمپیئن راکیش کمار نے بین الاقوامی مقابلوں میں ہندوستان کی نمائندگی کرنے اور مختلف مقابلوں میں طلائی تمغے حاصل کرنے کے اپنے متاثر کن سفر کا اِشتراک کیا۔
اِس تقریب میں آئی آئی ایم، آئی آئی ٹی اور کئی مینجمنٹ کالجوں جیسے نامور اِداروں کے طلبأ نے پرجوش شرکت کی۔ یہ سائنس، ٹیکنالوجی اور قومی ترقی کے درمیان نوجوان ذہنوں میں بڑھتی ہوئی دلچسپی کی عکاسی کرتا ہے۔
اِس موقعہ پر پر جوائنٹ ڈائریکٹر اِنفارمیشن (ہیڈ کوارٹر)، جوائنٹ ڈائریکٹر اِنفارمیشن جموں، ڈپٹی ڈائریکٹر (سینٹرل)، ڈپٹی ڈائریکٹر (اے وی)، ڈپٹی ڈائریکٹر اِنفارمیشن (پی آر) جموں اور ڈی آئی پی آر کے دیگر سینئر افسران اورملازمین موجود تھے۔
محکمہ اطلاعات و تعلقات عامہ نے میموریل لیکچر سیریز کی کامیابی میں اَپناکردار اَدا کرنے پر تمام شرکأ اور حاضرین کا تہہ دل سے شکریہ اَدا کیا۔
