نگران نیوز ڈیسک
سرینگر// منشیات فروشی کیخلاف اپنی کارروائیاں جاری رکھتے ہوئے جموں کشمیر پولیس نے بدھوا رکو جنوبی کشمیر کے شوپیان ضلع میں منشیات فروش کا رہائشی مکان ضبط کرلیا۔ نگران نیوز ڈیسک کے مطابق پولیس کی جانب سے جاری بیان میں بتایا گیا ہے کہ شوپیان پولیس نے ویشرو پائین کیلرمیں دو منزلہ رہائشی مکان زیر خسرا نمبر58 اور جس کی مالیت 31لاکھ روپے بتائی جاتی ہے، کو قانونی دفعات کے تحت ضبط کرلیا ۔ بیان کے مطابق پولیس کی جانب سے جاری تحقیقات میں یہ بات سامنے آگئی کہ مذکورہ رہائشی مکان منشیات فروشی کے ذریعہ حاصل کی گئی رقم سے تعمیر کیا گیا ہے۔مذکورہ جائیداد کی ضبطگی زیر ایف آئی آر نمبر03/2026پولیس تھانہ کیلر کے تحت عمل میں لائی گئی۔ جائیداد کی ضبطگی پولیس ٹیم، مجسٹریٹ، مقامی لمبر دار اور گائوں کے چوکیدار کے سامنے قانونی ضوابط کو ملحوظ نظر رکھ کر کی گئی۔
