مانٹیرنگ ڈیسک
سری نگر //امریکی صدر ڈونلڈ ٹرمپ نے ایران پر غیر معینہ مدت کیلئے حملے روکنے کا اعلان کیا ہے۔بدھ کی صبح 14روزہ جنگ بندی کی مدت ختم ہونے سے چند گھنٹے قبل امریکی صدر نے کہا کہ پاکستانی قیادت نے کہا ہے کہ ایران پر حملہ نہیں کریں گے اور ہم سے ایرانی قیادت کی متفقہ تجاویز آنے تک حملے روکنے کا فیصلہ کیاہے۔امریکی صدر نے کہا کہ جنگ بندی میں تب تک توسیع کررہے ہیں جب تک بات چیت کا عمل مکمل نہیں ہوجاتا، اس لیے جنگ بندی میں اس وقت تک توسیع رہے گی۔ تاہم صدر ٹرمپ نے بتایا کہ انہوں نے اپنی فوج کو ہدایت دی ہے کہ ناکہ بندی جاری رکھے اور ہر لحاظ سے تیار رہے۔ ٹرمپ نے کہا کہ آبنائے ہرمز امریکاکے کنٹرول میں ہے، کسی جہاز کو ایرانی بندرگاہ جانیکی اجازت نہیں ہے۔بعض امریکی میڈیا کا کہنا ہے کہ جنگ بندی میں توسیع 3یا 5دن کیلئے ہوگی۔دوسری جانب مشیر سپیکر ایرانی پارلیمنٹ مہدی محمدی نے امریکی صدر ڈونلڈ ٹرمپ کی جنگ بندی میں توسیع کے اعلان کو مسترد کردیا۔مشیر نے سوشل میڈیا پر جاری پیغام میں کہا کہ اس اعلان کی کوئی اہمیت نہیں، ایران کے خلاف جاری ناکہ بندی دراصل بمباری کے مترادف ہے اور اس کا جواب فوجی کارروائی کی صورت میں دیا جانا چاہیے۔ادھرجنگ بندی میں توسیع کے بعد آبنائے ہرمز میں تین مال بردار جہازوں پر حملے کئے گئے اوران میں سے، دو جہاز ایرانی تحویل میں ہیں۔ ایرانی میڈیا کو دیے بیان کے مطابق پاسداران انقلاب کی بحریہ کا کہنا ہے کہ اس نے خلاف ورزی کے مرتکب دو جہازوں کو اپنی تحویل میں لے لیا ہے۔اس نے کہا کہ لڑائی دوبارہ شروع ہوئی تو دشمن پر تباہ کن ضربیں لگائیں گے۔
