از قلم:منتظر مومن وانی
موجود حالاتن منز یمہ انمانہ نوجوان نسل بداخلاقکین وتھ بوو دتھ تہ اتھ ہنر ناو دتھ ولہء مونن چھ کھالان یہ سوری کینہہ چھ سنجید فکرن تہ مضبوط نظرن بانبراون تکیاز قومک نژن پیھژن چھ نوجوانن ہندین شانن پیٹھ آسان. حال حالی چھ کینژھو نوجوانو دسی”اسی گیہ بدل ” لفظن ہند اکھ باتھ بازار آمت تہ خوبصورت انہار تھاون والین نوجوانن ہنز اکھ جماعت چھ نژان تہ بے حیائی ہند منظر برونٹھ کن انتھ اخلاقی کمزوری پیش کران.تمہ نوجوان یمہ برونہہ کالہء ترجمانی تہ امامتک فرض اسی نکھ والان مگر بداخلاقی ہنر ناو دتھ کیا چھ یمہ قومس منز پھہلاوان یہ سوری چھ انسانس فکرن پاوان.پزپاٹھی گیہ اسی بدل تکیاز اسی رژھراو نہ تہ سوری یہ اسہ اسلافو تہ اکابرو وراثتس منز بخشمت اوس. اسی کنی بردباری, مقام, عزت,خودداری,حیا کھوٹن پونسن تہ مولی ہیوت تہ سوری کینہہ یمہ سببہء اسی آسمانہ پیٹھ زمینس لاینہ آئے. اسی گیہ بدل تکیاز اسہ تراو تعلیمی ترقی ہند ظن تہ اخلاقی قدرء کر لتہ مونجہ. قومس گی تمہ نوجوان اگادء یمن نہ قومچہ بدحالی ہنز کانہہ تہ فکر چھ بلکہ نژھن تہ بداخلاقی ہند نظارء قومس ہاون چھ تہنزن ترجیحاتن منز شامل. اسی گیہ بدل تکیاز تعلیمی ادارء گیہ مکمل بند تہ کانسہ ماجہ ہندء گوبرن مژاو نہ زیو ز سان خانہ مالی ہا گیہ واران. اسی گیہ بدل تکیاز اسی چھ معمولی کتھ باپت سرکاری دفترن منز چائے ونتھ رشوت پیوان دن. اسی گیہ بدل تکیاز سرکاری دفترن منز چھ معمولی ملازم سفید ریش بزرگن وقر والان. اسی چھ سود پونسن قربان کرتھ ہاو باو کران تہ پور محلس رعب داب تھاواں. اسی گیہ بدل اسی چھ اپز وننان, چھون تولان تہ پرتھ کانسہ ستی ڈیکہء ژکرتھ پیش یوان. اسی گی اوے بدل تکیاز اسی چھ مالس ماجہ سماجس منز وقر والتھ بے بس بناوان. اسی گیہ اوے بدل تکیاز اسہ چھ کورین ہن حصہ کھیتھ زیو ٹاس کڈان تہ تہندس مظلومتیس تماشہ وچھان. اسی گیہ بدل تکیاز بے شمار کورء چھ وومر ہند حد پار کرتھ تہ مانز نم پاراوان باپت پیاران. اسی گیہ بدل تکیاز میزبان قومس منز چھ ازکل یتیمن بے کسن بے بسن تہ لاچاران فاقہ لگان تہ پرژھ گار کرن والی چھ مژء نیندر. بوئے چھ بھایس زاگان تہ حسدن چھ پرتھ کانسہ اندری دوتہ دوتہ کورمت. اسی چھنہ بدل بلکہ اسی چھ تمے یمہ اسلافو ویژھمت چھ تہ یہند باپت رتیء پگہگ خاب دائیراونہ چھ آمت. ولیو یکوٹ نیرو ساری نوجوان تہ قومس دمو نوء پگہج آش تہ زندگی ہندیو دولابو منز کڈہون یہ قوم. قومس دمو تعلیمی, سائنسی, سیاسی, معاشی, اخلاقی ترقی ہنز فکر تہ تیوتھ معاشر کرو تعمیر یمیک آسہ وعد پنن اسلافن چھ دتمت. یتھ قومس کرن فضل کائناتک پالنہار سون مالک رب العالمین. آمین
