سرینگر:لوک سبھا اسپیکر اوم برلا نے آج شیر کشمیر انٹر نیشنل کنونشن سنٹر سرینگر میں مرکزی زیر انتظام علاقے جموں و کشمیر کے پنچائتی راج اداروں کو بااختیار بنانے کے پارلیمانی آؤٹ ریچ پروگرام کا افتتاح کیا ۔ اوم برلا کے علاوہ اس پروگرام میں جموں و کشمیر کے لفٹینٹ گورنر منوج سنہا ، مرکزی وزیر مملکت برائے جل شکتی اور فوڈ پروسیسنگ انڈسٹریز مسٹر پرہلاد سنگھ پٹیل ، مرکزی وزیر مملکت سماجی انصاف اور امپاورمنٹ کی وزارت رام داس اتھوالے ، مرکزی وزیر مملکت وزارت تعلیم محترمہ انپورنا دیوی ، سرینگر کے رُکن پارلیمنٹ ڈاکٹر فاروق عبداللہ ، جموں و کشمیر کے سابق نائب وزیر اعلیٰ نرمل کمار سنگھ ، ممبرانِ پارلیمنٹ اور دیگر معزز شخصیات نے شرکت کی ۔ اوم برلا نے کہا کہ آؤٹ ریچ پروگرام کا مقصد ہمارے جمہوری اداروں کو بنیادی سطح پر مضبوط اور زیادہ شفاف اور جوابدہ بنانا ہے ۔ انہوں نے کہا کہ گرام پنچائت جیسے جمہوری ادارے لوگوں کی زندگی کو بہتر بنا سکتے ہیں اور اس کیلئے اجتماعی اور مربوط کوششوں کی ضرورت ہے ۔ انہوں نے کہا کہ بااختیار پنچائتیں ہماری جمہوریت کو مضبوط بنائیں گی اور بڑے پیمانے پر لوگوں کا اعتماد بڑھے گا ۔ مسٹر برلا نے جموں و کشمیر میں پیش رفت کی تعریف کی اور کہا کہ یو ٹی امن ، ترقی اور خوشحالی کی راہ پر گامزن ہے ۔ اسپیکر نے کہا کہ بنیادی سطح پر جمہوری اداروں کی اجتماعی اور مربوط کوششیں ترقی کے ثمرات کو صف میں کھڑے آخری آدمی تک لے جائیں گی ۔ انہوں نے اس بات پر زور دیا کہ جمہوری اداروں کو ترقی کے ایجنٹ کے طور پر اپنی ذمہ داریاں نبھانے کی ضرورت ہے ۔ اس موقع پر انہوں نے یہ بھی یقین دلایا کہ لوک سبھا سیکرٹریٹ کی طرف سے مرکز کے زیر انتظام علاقے میں پنچائتی راج اداروں کے نمائندوں کیلئے صلاحیتوں کی تعمیر کے پروگراموں کیلئے وسیع انتظامات کئے جائیں گے ۔ اس موقعہ پر بات کرتے ہوئے مرکزی وزیر مملکت برائے جل شکتی اور فوڈ پروسیسنگ انڈسٹری مسٹر پرہلاد سنگھ پٹیل نے مختلف سرکاری اسکیموں جیسے پردھان منتری آواس یوجنا ، جل جیون مشن اور پردھان منتری اجوول یوجنا کا حوالہ دیا جو ماضی قریب میں مطلوبہ مستحقین تک پہنچ چکے ہیں ۔ انہوں نے کہا کہ جمہوریت میں پنچائتوں کا نچلی سطح پر ترقی کے ثمرات کو پہنچانے میں اہم کردار ہے ۔ جموں و کشمیر کے لفٹینٹ گورنر منوج سنہا نے کہا کہ گرام پنچائتیں اور پی آر آئی ہمارے ترقیاتی عمل کے مرکز میں ہیں اور وہ نچلی سطح پر اچھی حکمرانی فراہم کر سکتے ہیں ۔ 73 ویں اور 74 ویں آئینی ترامیم کا حوالہ دیتے ہوئے انہوں نے جموں و کشمیر میں تین درجے پنچائتی راج نظام کے نفاذ کی تعریف کی ۔ انہوں نے مزید کہا کہ جموں و کشمیر میں پی آر آئی کو بہتر بجٹ سپورٹ مرکز کے زیر انتظام علاقے کی تیزی سے ترقی کو یقینی بنا رہی ہے ۔ انہوں نے جمہوری اداروں کی شفافیت اور جوابدہی کو بہتر بنانے اور اس سلسلے میں ٹیکنالوجی کے استعمال پر بھی زور دیا ۔ اس موقعہ پر رُکنِ پارلیمنٹ سرینگر ڈاکٹر فاروق عبداللہ نے بھی خطاب کیا ۔ قبل ازیں لوک سبھا اسپیکر اوم برلا کا خیر مقدم کرتے ہوئے جموں و کشمیر کے سابق نائب وزیر اعلیٰ نرمل کمار سنگھ نے لوک سبھا اسپیکر کے اقدام کو سراہا جو کہ ہماری جمہوریت کے اعلیٰ ترین ادارے کو مقامی سطح پر بلدیاتی اداروں کو مضبوط بنانے میں شامل ہے ۔ سیکرٹری جنرل لوک سبھا مسٹر اتپال کمار سنگھ نے شکریہ کا ووٹ پیش کیا ۔ مسٹر رامپریت منڈل ممبر پارلیمنٹ اور لفٹینٹ گورنر کے مشیر بصیر احمد خان نے اختتامی خطاب کیا ۔
