امسال بجلی صارفین کو 10سے 12فیصد اضافی بجلی فراہم کی گئی: روہت کنسل

سرینگر//پاور ڈویلپمنٹ ڈیپارٹمنٹ کے پرنسپل سکریٹری اور جموں و کشمیر حکومت کے سرکاری ترجمان روہت کنسل نے کہا ہے کہ محکمہ موسم سرما خاص طور پر 40 دن کے سخت ‘چلئی کلاں کے لئے پوری طرح تیار ہے تاہم انہوں نے کہا کہ کشمیر کو گزشتہ سال کے مقابلے میں امسال 10 سے 12 فیصد زیادہ بجلی فراہم کی جا رہی ہے۔کشمیر نیوز سروس (کے این ایس) سے خصوصی گفتگو کرتے ہوئے کنسل نے کہا کہ موسم سرما سیکرٹریٹ کے ایک حصے کے طور پر میں وادی کے دورے پر ہوں تاکہ ہر ضلع میں بجلی کی صورتحال کے حوالے سے کی جا رہی تیاریوں کا جائزہ لیا جاسکے۔ انہوں نے کہا کہ سوموار کے روز میں نے پلوامہ ضلع کا دورہ کیا اور مجھے یہ دیکھ کر خوشی ہوئی کہ انتظامیہ موسم سرما کے دوران صارفین کو معقول طریقے سے بجلی فراہم کرنے کے حوالے سے مکمل طور پر تیار ہے۔انکا کہ تھا کہ دورے کے دوران مجھے مقامی لوگوں، افسران اور ڈپٹی کمشنر پلوامہ نے بتایا کہ پچھلے سال کے مقابلے میں ہر صارف کو امسال اوسطاً 3 سے 4 گھنٹے اضافی بجلی فراہم کی جا رہی ہے۔ انہوں نے کے این ایس کو مزید بتایا کہ جہاں تک وادی کا تعلق ہے، صارفین کو گزشتہ سال کے مقابلے میں 10-12 فیصد زیادہ بجلی فراہمی جارہی ہے تاہم انہوں نے کہا کہ محکمہ کو گزشتہ سال جن رکاوٹوں کا سامنا تھا ان میں بیشتر روکاوٹوں کو دور کر دیا گیا ہے لیکن ایک بات کا بھی مجھے اعتراف کرنا چاہیے کہ پچھلے سال وادی کے ہر صارف نے ہماری بہت عزت کی اور موسم سرما میں بجلی کا درست استعمال کرنے میں بہت تعاون کیا۔انہوں نے کہا کہ گزشتہ سال شدید برف باری ہوئی تاہم اس سال محکمہ بلاتعطل بجلی کی فراہمی کے لیے ہر ممکن کوشش کرنے کے لیے تیار ہے۔سرکاری ترجمان روہت کنسل نے لوگوں سے بھی اپیل کی کہ وہ بجلی کا درست ور مناسب طریقے سیاستعمال کریں تاکہ محکمہ سخت سردی کے موسم میں بھی صارفین کی بہتر خدمت کر سکے۔ انہوں نے مزید کہا کہ اگر لوگ بجلی کا درست استعمال کریں گے تو ہمارے پاس بجلی کی فراہمی زیادہ ہو گی اور ہم کٹوتی کی مدت کو کم کرنے کے قابل ہو جائیں گے۔انہوں نے کہا کہ میں نے تمام عہدیداروں پر واضح کر دیا ہے کہ وہ کٹوتی کے شیڈول کو عام کریں اور صارفین کو طے شدہ کٹوتی شیڈول کے مطابق سختی سے بجلی فراہم کریں تاہم انہوں نے معزرت کے ساتھ کہا کہ بدقسمتی سے ہم کٹوتی شیڈول کو مکمل طور پر ختم کرنے کی پوزیشن میں نہیں ہیں اس لیے ہمیں کچھ کٹوتیاں کرنی پڑتی ہے لیکن محکمہ کے افسران کو سخت ہدایات دی گئی ہیں کہ وہ کٹوتی شیڈول پر عمل کریں تاکہ لوگوں کو کسی قسم کی پریشانی کا سامنا نہ کرنا پڑے۔پی ڈی ڈی میں یومیہ اجرت پر کام کرنے والوں ملازمین کے احتجاج کے بارے میں پوچھے گئے ایک سوال کے جواب میں کمشنر موصوف نے کے این ایس کو بتایا کہ وہ محکمہ کے فرنٹ سپاہی ہیں اور گزشتہ سال انہوں نے برف باری کے دوران بجلی کی سپلائی ہر ممکن ممکن یقینی بناء اور محکمہ انہیں ہر قسم کا تعاون فراہم کرے گا۔سرکاری ترجمان نے لوگوں سے اپیل کی کہ وہ بجلی پر چلنے والے سخت آلات کے استعمال سے گریز کریں اور ان آلات پر پابندی بھی عائد کی گئی ہے تاہم انہوں نے کہا کہ لوگوں کو بروقت بجلی کے بل ادا کرنے چاہئیں۔انہوں نے مزید کہا کہ اگر عوام محکمہ کو ان تمام معاملات میں اپنا تعاون فراہم کریں گے تو محکمہ بجلی کی فراہمی کو بہتر کرنے کے قابل ہو جائے گا۔