سری نگر،16 فروری: وادی کشمیر میں بدھ کی علی الصبح زلزلے کے ہلکے جھٹکے محسوس کئے گئے تاہم کسی جانی یا مالی نقصان کی کوئی اطلاع نہیں ہے۔ریکٹر اسکیل پراس زلزلے کی شدت 3.2 ریکارڈ کی گئی جبکہ اس کا مرکز جنوبی کشمیر میں ترال سے پہلگام تک کا علاقہ بتایا جا رہا ہے۔نیشنل سینٹر فار سیسمولوجی کے مطابق یہ زلزلہ بدھ کی صبح 5 بجکر 43 منٹ پر آیا اور اس کی شدت ریکٹر اسکیل پر 3.2 ریکارڈ کی گئی جبکہ اس کی گہرائی 16 کلو میٹر تھی۔واضح رہے کہ جموں وکشمیر اور لداخ زلزلیاتی پیمانے پر سب سے زیادہ خطرناک پانچ اور چار زون میں آتے ہیں۔جموں وکشمیر میں 8 اکتوبر 2005 کو ایک قیامت خیز زلزلے کے نتیجے میں ایل او سی کے آر پار زائد از 80 ہزار لوگوں کی موت واقع ہوئی تھی اور بے تحاشہ مالی نقصان ہوا تھا۔ ریکٹر سکیل پر اس زلزلے کی شدت 7.6ریکارڈ ہوئی تھی۔ (یو این آئی)
