نگران نیوز ڈیسک:
سرینگر// اپریل ۱۱// سابق ریاستی وزیر اور جموں کشمیر اپنی پارٹی کے صدر سید الطاف محمد بخاری نے لیفٹیننٹ گورنر منوج سنہا کی جانب سے سوروزہ نشہ مکت جموں کشمیر ابھیان کو وقت کی ضرورت قرار دیا۔
انہوں نے ان باتوں کا ا ظہار سماجی رابطہ گاہ ایکس (سابق ٹویٹر ) پر کیا۔
الطاف بخاری کا کہنا تھا کہ سو روزہ نشہ مکت جموں کشمیر ابھیان کی کامیابی کیلئے ضروری ہے کہ جموں کشمیر کا ہر باشندہ اس میں متحرک طور پر اپنا کردار ادا کرے۔ انہوں نے کہا کہ ایک ایسے وقت میں جب کہ نوجوانوں کی ایک بڑی تعداد منشیات کی وبا میں گرفتار ہوچکی ہیں اور مزید تعداد اس کے ہدف کے دہانے پر ہے، اس طرح کا اقدام بروقت بھی ہے اور ضروری بھی۔
انہوں نے لیفٹیننٹ گورنر منوج سنہا کی جانب سے مہم کی شروعات کا خیر مقدم کیا۔ ”میں لیفٹیننٹ گورنر منوج سنہا کے اس بیان کہ منشیات کی لت میں ملوث افراد اور اس کی تجارت کرنے والوں کیخلاف سخت کارروائی جس میں پاسپورٹ اور آدھار کارڈ کی منسوخی اور جائیداد کی ضبطگی شامل ہیں، کی نہ صرف سراہنا کرتا ہوں بلکہ اس کی مکمل حمایت بھی کرتا ہوں۔ منشیات سے جڑے نیٹ ورک کو ختم کرنے کیلئے اس طرح کے اقدامات ناگزیر ہیں“۔
بخاری نے اپیل کرتے ہوئے کہا کہ سماج کے سبھی طبقوں کو متحد طور پر اس مشن کو کامیاب بنانے کی سعی کرنی چاہیے۔
