سرینگر// نگران نیوز ڈیسک// لیفٹیننٹ گورنر منوج سنہا نے سنیچروار کو ڈرگ کلچر کیخلاف انتظامیہ کے موقف کا اعادہ کرتے ہوئے کہا کہ جموں کشمیر منشیات فروشی اور اس سے جڑے نیٹ ورک سے نجات حاصل کرکے رہے گا۔ضلع راجوری میں نشہ مکت ابھیان جموں کشمیر مہم کے تحت پدیاترا کی قیادت کرتے ہوئے لیفٹیننٹ گورنر نے بتایا کہ جموں کشمیر حکومت منشیات فروشی اور اس سے جڑے نیٹ ورک کی کمر توڑنے کیلئے پُرعزم ہے۔ انہوں نے بتایا کہ گزشتہ 5دنوں کے دوران جموں کشمیر کی انتظامیہ نے ڈرگ مافیا کا قافیہ حیات تنگ کرکے 63منشیات سمگلروں کو گرفتار کرلیا ہے۔ انہوں نے کہا کہ اس ضمن میں 45ایف آئی آر بھی متعلقہ دفعات کے تحت درج کئے گئے ہیں۔سوشل میڈیا پر ایک ٹویٹ میں لیفٹیننٹ گورنر کا کہنا تھا کہ ’’میں نے راجوری میں پدیاترا میں حصہ لیکر نشہ مکت جموں کشمیر مہم کے تحت عوامی اجتماع سے خطاب کیا‘‘۔ انہوں نے بتایا کہ راجوری ضلع سرحد کیساتھ منسلک ہونے کے نتیجہ میں انتہائی حساس علاقہ ہے جہاں سرحد پار سے ڈرگ سمگلنگ کی سرگرمیاں ہونے کا اندیشہ ہے۔لیکن جموں کشمیر کی حکومت ڈرگ مافیا کے نیٹ ورک کو جڑ سے اُکھاڑ پھینکنے اور سماج کو منشیات سے پاک کرنے کیلئے پُرعزم ہے۔ انہوں نے کہا کہ رواں مہینے کی گیارہ تاریخ سے لیکر ابھی تک جموں کشمیر پولیس نے ڈرگ مافیا کیخلاف جاری کریک ڈائون میں تیزی لائی ہے۔ ’’45سے زائد ایف آئی آر درج ہوچکے ہیں اور 63منشیات سمگلروں کو گرفتار کرلیا گیا ہے جبکہ11اپریل سے لیکر15پراپریل تک مختلف کارروائیوں کے دوران منشیات کی بھاری کھیپ بھی ضبط کی گئی ہے۔لیفٹیننٹ گورنر کا کہنا تھا کہ مہم کو جاری رکھتے ہوئے انتظامیہ کی جانب سے اسکولوں، ادویات کی دوکانوں اور ڈرگ ایجنسیوں پر کڑی نگاہ رکھی جارہی ہیں۔
