سرینگر:لیفٹنٹ گورنر منوج سنہا نے خواتین انٹر پرینوروں کے رول کی ستائش کرتے ہوئے ان سے اپیل کی کہ وہ جموں وکشمیر کے ان نوجوانوں کو صحیح اور باوقر راستے پرلانے کیلئے رہنمائی کریں جو بھٹک گئے ہیں۔ایل جی نے کہا کہ سرکار خواتین کے سیلف ہیلپ گروپ کو نئے مارکیٹوں تک رسائی دینے کیلئے درکار رقومات کے ساتھ ساتھ ہنر مند بنانے کیلئے ہرممکن مدد فراہم کرے گی۔ایس این ایس کے مطابق منوج سنہا سرینگر کے ایس کے آئی سی سی میں دیہی خواتین انٹر پرنیوروں سے متعلق انٹر پرائز ایکسلریشن پروگرام ’’SAATH‘‘کی افتتاحی تقریب پر خیالات کا اظہار کررہے تھے۔انہوں نے کہا کہ حکومت نے ایک ہمہ گیر اپروچ اختیار کررکھا ہے جس کے تحت خواتین انٹر پرینور ایکو سسٹم تیار کیا جارہاہے تاکہ وہ تجارت کے ساتھ جڑ کر مضبوط ورک فورس کے طور ابھر سکیں۔ایل جی نے ان خواتین انٹر پرنیوروں سے اپیل کی کہ وہ ان نوجوانوں کو راہ راست پر لانے کیلئے رہنمائی کریں جو بھٹک گئے ہیں۔منوج سنہا نے کہا کہ سرکار خواتین اور نوجوانوں کیلئے بنیادی سطح کے ڈھانچے کو مضبوط کررہی ہے تاکہ ان کو انفرادی سطح پر ترقی دینے کا موقعہ مل سکے۔گورنر موصوف نے کہا کہ آج کے دور میں جموں وکشمیر کے نوجوانوں کو قومی سطح پر ابھرنے کی زیادہ خواہشات ہیں بہ نسبت ماضی کے اور آج ہرایک نوجوان قومی سطح پر اپنے آپ کو آگے دیکھنا چاہتاہے۔ایل جی نے کہا کہ آج کے انٹر پرینوروں کیلئے اپنے ارد گرد کمیونٹی تشکیل دینے اور سمارٹ انٹر پرائزز بنانے کیلئے وسائل دستیاب ہیں۔انہوں نے کہا کہ یہی وجہ ہے کہ آج کل خواتین انٹر پرینورس بھی اچھی خاصی تعداد میں سامنے آرہی ہیں جبکہ نوجوان مختلف صورتوں میں سماج کو آگے بڑھانے کیلئے کام کررہے ہیں۔ایل جی نے کہا کہ یہی ہمارے رول ماڈل ہیںبجائے ان کے جو خون خرابے اور تشدد کے پیچھے پڑے ہیں۔ایل جی کے مطابق دیہی علاقوں میں تجارت کے جوش وخروش کے ساتھ ساتھ ’’SAATH‘‘کے تحت موجودہ انٹر پرائزز کو ہنر مند ،راہنما بنانے اور مارکیٹوں کے ساتھ راست طور جوڑنے کیلئے بھی سرگرمی کے ساتھ کام ہورہاہے۔اس دوران مشن ڈائریکٹر رورل لائیولی ہوڈ مشن ڈاکٹر صحرش اصغر نے کہا کہ رورل مشن نے سیلف ہیلپ گروپ سکیم کے تحت دیہی علاقوں میں 4لاکھ خواتین کو مدد فراہم کرنے کا نشانہ مقرر کیا ہے۔انہوں نے مزید کہا کہ 5ہزار ورکشاپوں اور ٹریننگ و کیپسٹی بلڈنگ کے تحت 5سو خواتین کو شامل کیا جائے گا۔
