سرینگر//وزیر اعظم نریندر مودی نے گجرات اور ہماچل پردیش میں بی جے پی کو عوام کی زبردست حمایت حاصل ہونے پر کہا ہے کہ ملکی عوام اب سمجھ رہی ہے کہ کون سی پارٹی ملک کو صحیح سمت میں لے رہی ہے ۔ انہوں نے کہا کہ گجرات میں اب کی بار جس طرح سے لوگوں نے بی جے پی کے امیدوار کو کامیابی دلائی اس سے صاف ظاہر ہے کہ ہمارے فیصلوں سے لوگ خوش ہیں ۔ انہوں نے کہا کہ یہ بھاجپا سرکار ہی ہے جس نے صدیوں سے تنازعہ کے شکار رام مندر کو اپنی جگہ واپس دلائی جس سے بھگوان رام کے لاکھوں نہیں کروڑوں پیرو کار خوش ہیں ۔ مودی نے کہا کہ بھاجپا سرکار نے سات دہائیوں سے تنازعہ بنے کشمیر کو حل کرکے ملکی سالمیت کو یقینی بنایا ۔ انہوںنے کہا کہ یہ سرکار ہی ہے جس نے دشمن کو قراراجواب دیکر ایسا سبق سکھایا کہ اب وہ دوبارہ ایسی غلطی کرنے کی سوچ بھی نہیں سکتا ۔ سی این آئی کے مطابق وزیر اعظم نریندر مودی نے کہا ہے کہ گجرات اور ہماچل پردیش اسمبلی انتخابات میں بی جے پی کو جو عوام کی زبردست حمایت حاصل ہوئی ہے وہ ایک نئے بھارت کی امنگوں کی عکاسی کرتی ہے۔ مودی نے کہا کہ پارٹی کو حاصل ہونے والی عوامی حمایت، بھارت کے نوجوانوں کی یووا سوچ کا ایک مظہر ہے۔وزیراعظم نے کہا کہ لوگ سمجھ چکے ہیں کہ کونسی پارٹی ملک کو صحیح سمت میں لے رہی ہے اور کونسی پارٹی ہے جس نے دہائیوں سے ملکی عوام کو عذاب میں رکھا تھا ۔ پی ایم مودی نے کہا کہ ہم نے لاکھو ں نہیں بلکہ کروڑوں لوگوں کی مذہبی امنگ کو پورا کیا ہے اور ایودھیا میں رام جنم بھومی پر ایک بھویہ مندر کی تعمیر کا کام شروع کروایا ہے ۔ وزیر اعظم نے کہا کہ مندر مسجد کے تنازعہ سے لاکھوں لوگ پریشان تھے اور سبھی اس کے فیصلے سے اب خوش ہیں۔ انہوںنے بتایا کہ کانگریس پارٹی نے جو تنازعہ کشمیر ملک کیلئے ناسور بنارکھا تھا بھاجپا کی حکومت نے اس کو ہمیشہ کیلئے ختم کردیا ہے ۔ انہوں نے کہا کہ اب کشمیر میں ہڑتال اور کرفیوکیوں نہیں ہوتا وہ صرف اسلئے کہ بی جے پی کی سرکار نے جرت کا مظاہرہ کرتے ہوئے آرٹیکل کوختم کرکے تنازہ کو ہمیشہ کیلئے دفن کردیا ۔ کَنئی دلی میں پارٹی ہیڈ کوارٹرس میں پارٹی ورکروں سے خطاب کرتے ہوئے جناب مودی نے کہا کہ انتخابات کے نتائج سے ظاہر ہوتا ہے کہ عام شہری ایک ترقی یافتہ بھارت کیلئے زبردست خواہش رکھتا ہے۔ مودی نے کہا کہ بی جے پی کو حاصل ہونے والی زبردست حمایت بہت اہم ہے کیونکہ یہ حمایت ایک ایسے وقت میں حاصل ہوئی ہے جب بھارت امرت کال میں داخل ہوا ہے۔ انہوں نے بتایا کہ یہ جیت 2024کے پارلیمانی انتخابات پر کافی اثر انداز ہوں گے ۔ وزیر اعظم نے ہماچل پردیش کے عوام کو یقین دلایا کہ مرکزی حکومت چنائو میں بی جے پی کی ہار کے باوجود ریاست کی ترقی کے لئے کوئی کسر نہیں چھوڑے گی۔وزیر اعظم نے کہاکہ مرکزی سرکار ملک کے تمام خطوں کی یکساں ترقی کی متمنی ہے اور ہماچل پردیش کے عوام نے جس انداز سے بھاجپا کے امیدواروں کیلئے ووٹ کاسٹ کئے اس سے صاف ظاہر ہے کہ اگلی بار بی جے پی ہماچل پردیش میں بھی کامیابی کے جھنڈے گاڑے گی ۔
