نیوز ڈیسک//
لہیہ،18اگست:یونین ٹریٹری لداخ کے مارکرد دراس علاقے میں جمعے کی سہ پہر کباڈی دکان کے نزدیک ایک پر اسرار دھماکہ ہوا جس کے نتیجے میں 12 افراد شدید طورپر زخمی ہوئے ، جنہیں علاج ومعالجہ کی خاطر نزدیکی ہسپتال منتقل کیا گیا تاہم ڈاکٹروں نے تین کو مردہ قرار دیا۔ڈپٹی کمشنر نے بتایا کہ دھماکے میں تین افراد ہلاک جبکہ نو دیگر زخمی ہوئے جن میں سے دو کی حالت نازک بنی ہوئی ہے۔سرکاری ذرائع نے بتایا کہ مہلوکین کے گھر والوں کو فی کس ایک لاکھ روپیہ بطور ایکس گریشا فراہم کیا جائے گا۔اطلاعات کے مطابق یونین ٹریٹری لداخ کے مارکرد دراس میں جمعے کی سہ پہر کباڈی دکان کے باہر ایک زور دار دھماکہ ہوا جس وجہ سے وہاں پر کام میں مصروف غیر مقامی سمیت 12 افراد زخمی ہوئے۔معلوم ہوا ہے کہ زخمیوں کو علاج ومعالجہ کی خاطر نزدیکی ہسپتال منتقل کیاگیا جہاں پر تعینات ڈاکٹروں نے تین افراد کو مردہ قرار دیا۔ذرائع نے بتایا کہ زخمیوں میں سے کئی ایک کی حالت نازک بنی ہوئی ہے جنہیں مزید علاج ومعالجہ کی خاطر کرگل منتقل کیا گیا۔ضلعی انتظامیہ کے ایک عہدیدار نے نامہ نگاروں سے بات چیت کے دوران بتایا کہ کباڈی کے دکان کے باہر اس وقت دھماکہ ہوا جب سامان کو گاڑی میں لوڈ کیا جارہا تھا۔انہوں نے بتایا کہ جس جگہ پر دھماکہ ہوا اس کو سیل کیا گیا اور ہفتے کے روز فوج اس پورے علاقے کو سینی ٹائز کرئے گی۔ان کا مزید کہنا تھا کہ اس دھماکہ میں ایک غیر مقامی سمیت تین افراد از جان ہوئے جبکہ زخمیوں میں سے کئی ایک کی حالت بھی نازک بنی ہوئی ہے۔مذکورہ عہدیدار کے مطابق مہلوکین کے لواحقین کو فی کس ایک لاکھ روپیہ بطور ایکس گریشا دینے کا فیصلہ لیا گیا ہے۔ان کے مطابق کباڈی کو کس نے یہاں پر سامان جمع کرنے کی اجازت دی اس کی تحقیقات شروع کی گئی ہے۔دریں اثنا ڈپٹی کمشنر کرگل نے جمعے شام دیر گئے ہسپتال کے باہر نامہ نگاروں سے بات چیت کے دوران بتایا کہ دراس دھماکے میں تین افراد ہلاک جبکہ نو دیگر زخمی ہوئے ہیں۔انہوں نے مزید بتایا کہ زخمیوں میں سے مزید دو کی حالت بھی نازک بنی ہوئی ہے۔انہوں نے کہاکہ دھماکے کی اطلاع ملتے ہی اے ڈی سی ، ڈی ایس پی اور دیگر سینئر عہدیدار جائے موقع پر پہنچے اور زخمیوں کو طبی امداد کی خاطر نزدیکی ہسپتال منتقل کیا۔یو این آئی
