کشمیر انفو//
جموں 18 اپریل :چیف سیکرٹری ڈاکٹر ارون کمار مہتا نے منگلوار کو جموں اینڈ کشمیر منرلز لمٹیڈ کی 175 ویں بورڈ میٹنگ کی صدارت کی ۔ میٹنگ کے دوران چیف سیکرٹری نے کارپوریشن کی کانوں کی کارکردگی کا جائیزہ لینے کیلئے تھرڈ پارٹی آڈٹ کی ضرورت پر زور دیا ۔ انہوں نے کہا کہ آڈٹ اس بات کا جائیزہ لے گا کہ کانیں اپنی بہترین حالت میں کام کر رہی ہیں اور اس بات کا تعین کرے گی کہ ان کان کنی کی سہولیات میں مزید روز گار پیدا کرنے کی صلاحیت موجود ہے ۔ ڈاکٹر مہتا نے کالا کوٹ کوئلے کی کانوں کی پیداوار بڑھانے کیلئے ماہرانہ مشاورت کے ساتھ کان کنی کا منصوبہ تیار کرنے پر بھی زور دیا ۔ چیف سیکرٹری نے کارپوریشن پر زور دیا کہ ان کی تمام سرگرمیوں کا مقصد جموں و کشمیر کی معیشت کو فروغ دینا ہے ۔ انہوں نے گذشتہ تین برسوں میں کارپوریشن کے مالیاتی ریکارڈ کی تعریف کی اور بہتر کوارڈینیشن اور فیصلوں پر عمل درآمد کیلئے سہ ماہی اجلاس منعقد کرنے کا مشورہ دیا ۔ میٹنگ کے دوران بورڈ نے متفقہ طور پر اس بات پر اتفاق کیا کہ این ایم ای ٹی ( نیشنل منرل ایکسپلوریشن ٹرسٹ ) کے تحت فنڈنگ حاصل کرنے کیلئے جے اینڈ کے منرلز لمٹیڈ سیفائر مائن کے لیز ہولڈ رائٹس کو سونپ دے گا تا کہ وزارت کانوں کا کام شروع کر سکے ۔ مزید براں بورڈ نے شفافیت کو فروغ دینے کیلئے رف نیلم کی ای نیلامی کی منظوری دی ۔ بورڈ کے ممبران میں سیکرٹری پلاننگ ڈیولپمنٹ اینڈ مانیٹرنگ ڈاکٹر راگھو لینگر ، سیکرٹری کان کنی امیت شرما ، ڈائریکٹر ارضیات اور کان کنی او پی بھگت ، منیجنگ ڈائریکٹر جے کے ایم ایل وکرم گپتا ، ڈی جی کوڈز ایس ایل پنڈتا کے علاوہ دیگر متعلقہ محکموں کے افسران شامل تھے ۔
