سری نگر: لیفٹیننٹ گورنر منوج سنہا نے آج جموں و کشمیر کے کووڈ ٹاسک فورس ، ڈپٹی کمشنرز اور ڈسٹرکٹ ایس ایس پی کے ساتھ منعقدہ ایک میٹنگ کی صدارت کی ۔ لیفٹیننٹ گورنر نے یو ٹی میں ضلع وار کووڈ منظر نامے کا جائیزہ لیا اور ضلعی انتظامیہ سے کاروائی کی رپورٹ طلب کی ۔ انہوں نے کہا کہ جموں و کشمیر حکومت کو عالمی وبائی امراض کے خلاف لڑائی میں مرکزی حکومت کی مکمل حمایت حاصل ہے ۔ انہوں نے کہا کہ مرکزی حکومت نے ویکسی نیشن کی 6.5 لاکھ خوراکوں کے بجائے جموں و کشمیر کو 16 لاکھ سے زیادہ خوارکیں فراہم کی ہیں ۔ انہوں نے مزید کہا کہ اس سے یو ٹی حکومت کو اگست تک پہلی خوراک کے ساتھ 60 فیصد آبادی کا احاطہ کرنے کا ہدف حاصل کرنے میں مدد ملے گی ۔ لفٹینٹ گورنر نے کہا کہ 45 سال اور اس سے زیادہ عمر کے گروپ میں پہلی خوراک کی جموں و کشمیر کی اوسط ویکسی نیشن کووریج 99.9 فیصد ہے اور مثبت شرح 0.2 فیصد رہ گئی ہے ۔ لیفٹیننٹ گورنر نے ڈی سیز اور ایس ایس پیز کو ہدایت دی کہ وہ کووڈ مناسب رویے پر عمل نہ کرنے کے خلاف زیرو ٹالرنس اپنائیں تا کہ اس بات کو یقینی بنایا جا سکے کہ کووڈ کی صورتحال کنٹرول میں رہے ۔ انہوں نے ڈویژنل کمشنرز اور ڈی سیز کو ہدایت دی کہ کنٹینمنٹ اقدامات کے موثر نفاذ کیلئے مشترکہ ٹیموں کے کام کی نگرانی کریں ۔ لیفٹیننٹ گورنر نے کہا کہ کووڈ مناسب رویے پر عمل پیرا ہونا ، ہدف شدہ آبادی کی 100 فیصد ویکسی نیشن کووریج ، زیادہ سے زیادہ ٹیسٹنگ ، ماسک پہننا ، مائیکرو کنٹینمنٹ زون پر سختی سے عملدرآمد ، موثر طبی انتظام کو تیسری لہر کے خطرے کو ختم کرنے کیلئے مشن موڈ میں یقینی بنانے کی ضرورت ہے ۔ لیفٹیننٹ گورنر نے محکمہ صحت کو ہدایت دی کہ وہ کالج اور یونیورسٹی کے طلبا کی ویکسی نیشن کو ترجیح دیں ۔ انہوں نے مزید کہا کہ چونکہ جموں و کشمیر میں کووڈ کی صورتحال میں نمایاں بہتری آئی ہے ، اب ہم تعلیمی ادارے کھولنے کے منصوبے پر کام کر سکتے ہیں ۔ ایڈیشنل چیف سیکرٹری محکمہ صحت اور طبی تعلیم اتل ڈولو نے کووڈ 19 وبائی امراض کا تفصیلی ضلع وار تجزیہ دیا جس میں ویکسین کی دستیابی ، کووڈ 19 معاملات کا روزانہ کا رحجان ، روزانہ کی جانچ کا رحجان وغیرہ شامل ہیں ۔ لیفٹیننٹ گورنر کے مشیر راجیو رائے بٹھناگر ، چیف سیکرٹری ڈاکٹر ارون کمار مہتہ ، پرنسپل سیکرٹری داخلہ شالین کابرا ، پرنسپل سیکرٹری پبلک ورکس ( آر اینڈ بی ) شلیندر کمار ، لفٹینٹ گورنر کے پرنسپل سیکرٹری نتیشور کمار ، اے ڈی جی پی مکیش سنگھ ، ڈویژنل کمشنر کشمیر پی کے پولے ، آئی جی پی کشمیر وجے کمار ، ڈویژنل کمشنر جموں ڈاکٹر راگھو لانگر ، ڈپٹی کمشنرز اور ایس ایس پیز ذاتی طور پر یا ورچول موڈ کے ذریعے میٹنگ میں موجود تھے ۔
