کرگل ؍؍ابراہیم فردوس؍؍سیج روحانیون امام خمینی میموریل ٹرسٹ کی جانب سے ہر سال کی طرح اس سال بھی شہیدان مدافعان حرم سردار مقاومت الحاج قاسم سلیمانی و ابو مہدی المہندس کی تیسری برسی کی مناسبت پرخمینی ٹاورکے کنوینشن ہال میں ایک نمائشی پروگرام منعقد کیاجارہا ہے جس میں مسلسل دارالقرآن کے طلباء طالبات کے ساتھ ساتھ ضلع ہیڈکوارٹر کے قرب و جوار سے مومنین و مومنات کی بڑی تعداد شرکت کر رہی ہے۔ اس سلسلے میں آج چار مختلف گاؤں جن میں برو خاص،زگنگ پشکم،تھرمسہ پشکم اور لوچم سے دارالقرآنوں کے ایک سواسی طالب علموں نے مذکورہ نمایش گاہ میں حاضری دی ۔ اس موقع پر شیخ محمد حسین اخلاقی،مولانا ناصر علی پشکم، شیخ ابراہیم کریمی اورمولانا عباس کراری نے طلباء کو شہداء کے ایثاروفداکاری،انسانیت کے تئیں انکی بے لوث خدمات کے بارے میں جانکاری فراہم کی جبکہ اس نمائشگاہ میں ثانی زہرا حضرت زینب کبریٰ سلام اللہ علیہا کی شبیہ روضہ مبارک بھی بنی ہوئی ہے جہاں پرعلمائے کرام نے بچوں کوحضرت زینب بنت علی علیہما السلام کی انسانیت ساز قربانی اور انکی شجاعت و دلیری کے بارے میں آگاہ کیا۔ درایں اثناامام خمینی کنونشن ہال میں شیخ محمد علی آصفی نے طلباء وطالبات کو پروجیکٹر کے ذریعے شہداء مقاومت کے کارناموں اور بسیج روحانیوں کی کارکردگی پر مشتمل ویڈیوز پیش کرکے آگاہی فراہم کی۔اس دوران مولانا محبوب علی اور شیخ ایوب صابری نے طلباء وطالبات اور اساتذہ کرام وکمیٹی ممبران کا خیر مقدم کیا۔واضح رہے کہ تین جنوری کو سردار مقاومت حاج قاسم سلیمانی وابو مہدی مہندس کی تیسری برسی کے موقع پر چیرمین امام خمینی میموریل ٹرسٹ جناب شیخ صادق رجائی نے وائس چیرمین جناب شیخ بشیر شاکر کے ہمراہ مذکورہ نمائش گاہ کا افتتاح کیا ۔تب سے یہ سلسلہ جاری ہے اور آٹھ جنوری کی سہ پہر 3بجے تک جاری رہے گا
