کشمیر انفو//
پلوا مہ/22؍جولائی:ضلع ترقیاتی کمشنر پلوامہ ڈاکٹر بشارت قیوم نے آج ضلع میں یوم آزادی ۔2023ء کو خوش اَسلوبی سے منانے کے لئے مختلف محکموں کی طرف سے کئے گئے اِنتظامات کا جائزہ لینے کے لئے متعلقہ اَفسران کی میٹنگ منعقد کی۔ابتداً، ضلع ترقیاتی کمشنر نے قومی تقریب کی اہمیت پر روشنی ڈالی اور لائن ڈیپارٹمنٹوں کے متعلقہ اَفسروں کو ان کے کردار اور ذمہ داری کے بارے میں آگاہ کیا ۔ اُنہوں نے اُنہیں ہدایت دی کہ وہ ضلع بھر میں جوش و خروش کے ساتھ تقریبات کا اِنعقاد کے لئے پیشگی فول پروف اِنتظامات کریں۔اُنہوں نے ہماری عظیم قوم کے تنوع کی نمائندگی کرنے والی مختلف ثقافتی سرگرمیوں کی شمولیت پر زور دیا اور قومی تقریب میں طلباء ، نوجوانوں اور فن کاروں کی شمولیت پر بھی زور دیا۔ میٹنگ میں شرکأکی سہولیت کے لئے بنیادی ڈھانچے اور سہولیات، نشستوں کے اِنتظامات ، ٹریفک مینجمنٹ ،طبی اِمدادی مراکز اور ریہرسل سے لے کر مرکزی تقریب تک کئے جانے والے اِنتظامات کا جائزہ لیا گیا۔میٹنگ میں جانکاری دی گئی کہ مرکزی تقریب ڈی پی ایل پلوامہ میں منعقد کی جائے گی جبکہ مقامی اِنتظامیہ سب ڈویژن ، بلاک اور تحصیل کی سطح پر قومی تقریب منعقد کرے گی۔ضلع ترقیاتی کمشنر نے مختلف محکموں کے ضلعی سربراہان کو ہدایت دی کہ وہ ضلعی ہیڈ کوارٹر ،صوبائی سطح پر ہونے والی یوم آزادی کی تقریب میں اَفسروں اور ملازمین کی موجودگی کو یقینی بنائیں۔دریں اثنأ ، میٹنگ میں پرچم کشائی ، مارچ پاسٹ ، ثقافتی پروگرام ، نشستوں کے اِنتظامات ، سٹیج کی ترتیب اور یوم آزادی کی تقریب کے لئے ریفریشمنٹ کے اِنتظامات پر تبادلہ خیال کیا گیا۔متعلقہ اَفسروں کو سیکورٹی کے فول پروف اِنتظامات کرنے اور پینے کے پانی ، بجلی کی فراہمی ، طبی سہولیت ، صفائی ، ٹرانسپورٹ ، ٹریفک ریگولیشن اور اہم سرکاری عمارتوں کو چراغاں کرنے کے علاوہ فائرٹینڈروں کی تعیناتی ، نشستوں کے اِنتظامات اور دعوت ناموں کی تقسیم وغیرہ کی ہدایات دی گئیں۔اُنہوں نے متعلقہ اَفراد پر زوردیا کہ وہ طلباء اور فن کاروں کے لئے قیام و طعام کے علاوہ جشن آزادی میں ان کی شرکت کے لئے اِنتظامات کریں۔ضلع ترقیاتی کمشنر نے متعلقہ اَفسروں کو ہدایت دی ہ وہ یوم آزادی کے موقعہ پر پریڈ میں سکولی بچوں ، این سی سی اور این ایس ایس کیڈروں ، پولیس ، بینڈ پارٹی اور دیگر ٹیموں کی زیادہ سے زیادہ شرکت کو یقینی بنائیں۔چیف ایجوکیشن آفیسر اور ڈی وائی ایس ایس او کو دیگر متعلقہ اَفسروں کے ساتھ حب الوطنی اور مقامی ثقافت پر خصوصی توجہ دیتے ہوئے مختلف ثقافتی پروگرام تیار کرنے کی ہدایت دی گئی۔ضلع ترقیاتی کمشنر نے قومی پرچم لہرانے کی اہمیت پر زور دیا اور قومی پرچم کی عزت اور وقار کو یقینی بنانے کے لئے قومی پرچم کے ضابطے کی پاسداری پر بھی زور دیا۔میٹنگ میں ایس ایس پی پلوامہ ، اے ڈی ڈی سی پلوامہ ، اے ڈی سی پلوامہ ، اونتی پورہ ، ترال ، اسسٹنٹ کمشنر ریونیو ، چیف میڈیکل آفیسر ، چیف ایجوکیشن آفیسر ، ڈی وائی ایس ایس او پلوامہ ، فوج اور سی آر پی ایف کے مختلف یونٹوں کے اَفسران نے شرکت کی۔
