سرینگر// پوری قوم کو ہمارے جوانوں کی صلاحیتوں اور ملک کی حفاظت میں ان کے تعاون پر فخر اور اعتماد ہے کی بات کرتے ہوئے وزیر دفاع راجناتھ سنگھ نے ملک کی سلامتی اور اقتصادی ترقی کو یقینی بنانے میں مسلح افواج اور نیم فوجی دستوں کے تعاون کی تعریف کی ۔سی این آئی مانیٹرنگ ڈیسک کے مطابق وزیر دفاع راج ناتھ سنگھ نے اتراکھنڈکے اولی میں مسلح افواج کے جوانوں اور آئی ٹی بی پی کے جوانوں کے ساتھ وجئے دشمی منائی۔ وزیر دفاع راجناتھ سنگھ نے اپنے دورے کے دوران شاستر پوجا کی اور ملک کی سلامتی اور اقتصادی ترقی کو یقینی بنانے میں مسلح افواج اور نیم فوجی دستوں کے تعاون کی تعریف کی۔جوانوں سے ایک فوری خطاب میں راج ناتھ سنگھ نے کہا کہ وردی میں مردوں اور عورتوں کے ساتھ بات چیت، ہمیشہ حوصلہ افزائی کا ذریعہ بنتی ہے۔ انہوں نے اس بات کی تصدیق کی کہ پوری قوم کو ہمارے جوانوں کی صلاحیتوں اور ملک کی حفاظت میں ان کے تعاون پر فخر اور اعتماد ہے۔ وزیر دفاع نے بیرونی خطرات سے قوم کو محفوظ بنانے میں ملک کی افواج کے کردار کی تعریف کی۔ انہوں نے کہا، ’’اس محفوظ ماحول نے ہندوستان کو اقتصادی ترقی کو آگے بڑھانے اور وزیر اعظم نریندر مودی کی قیادت میں ترقی کی نئی بلندیوں کو حاصل کرنے کے قابل بنایا ہے‘‘۔وزیر دفاع نے گلوان کے واقعہ کے دوران اپنے جوانوں کی بے مثال شجاعت اور حوصلہ کی بھی ستائش کی۔ انہوں نے کہا کہ ہندوستان اس اصول پر یقین رکھتا ہے کہ ’’پوری دنیا ایک خاندان ہے‘‘ لیکن اگر کوئی بیرونی عنصر ہم پربری نظر ڈالتا ہے تو اسے منہ توڑجواب دیا جائیگا۔ انہوںنے مزید کہا کہ اس طرح کی شجاعت کی وجہ سے پوری دنیا میں ہندوستان کے بڑھتے ہوئے قد کو تسلیم کیا ہے اور ہندوستان ایک اہم فیصلہ سازوں میں سے ایک کے طور پر ابھرا ہے۔ بین الاقوامی فورمز پر ، ہندوستان کو احترام کے ساتھ سنا جاتا ہے۔راجناتھ سنگھ نے شاستر پوجا کی اہمیت کے بارے میں بھی بات کی اور ہندوستانی ثقافت کی روایات اور انفرادیت پر روشنی ڈالی، جو کہ تمام چیزوں کے اتحاد پر زور دیتی ہے۔ انھوں نے کہا کہ وہ ہمیں یہ سکھاتے ہیں کہ ہمیں ان چیزوں، جو ہماری زندگیوں میں’’شاستر‘‘ (ہتھیار) سمیت جاندار اور غیرجاندار ہوں، اْن تمام چیزوں کے تعاون کو تسلیم کرنا چاہئے جو ہمیں اپنے دفاع میں مدد فراہم کرتی ہیں۔
